Krasniqi: Mos u boni komunistë e me thanë kurrkush s’guxon me u pagu ma shumë se presidenti

Në seancën e sotme të Kuvendit të Kosovës, Krasniqi ka thënë se koncepti se presidenti është lider suprem me pagë e me gjithçka tjetër, është koncept më shumë se komunist.

“Me e kufizu TRUST’in e krejt agjencitë është absurditet. S’ka koncept politik e as ekonomik. Kjo është me ba hajgare. Ka amendamente që me miliona e bllokojnë shtetin, e ju tentoni me i kursye këtu 500 mijë euro. Mos boni hajgare more. Me këtë logjikë, s’guxojnë në Trust me u pagu ma shumë se deputetët, se kishe deputeti koka ma i miri se neve na paska zgjedh populli”, ka thënë Krasniqi.

Sipas deputetit të PDK’së, në TRUST punojnë profesionistët dhe gjithherë kanë pasur një performancë të mirë.

“E sot çka po dojna me ba, me thanë që i kena disa ekspertë e disa kushëri.  Nuk pajtohem me logjikën se presidenti e ka koeficientin 10, e kërkush s’guxon me pas pagë ma të madhe. Qit ide po doni me instalu. Ju lutemi kolegë që s’mundemi me ba ligje, bazuar në inate personale. Ndërmarrjet publike duhet me kanë konkurrente me ndërmarrje private në treg të lirë”, ka thënë Krasniqi.

Kundër Krasniqit kanë dalë deputetë të LDK’së e Vetëvendosjes, raporton Periskopi.

Deputetja Hykmete Bajrami e deputeti Glauk Konjufca kanë përmendur humbjet milionëshe të TRUST’it në vitin 2018.

“Për çfarë parimesh po flisni ju tash. Ju po thoni se duhet të vlej ky ligj deri më 2022, e pastaj çka me ndodh? Çka dallon tash prej vitit 2022. Mos e ke për me mbrojt dikë aty”, ka thënë deputetja e LDK’së, Bajrami.

Ndërsa, Konjufca tha se është e papranueshme që dikush në Kosovë të ketë pesëfishin e pagës mesatare në vend./PERISKOPI