Haradinaj shpërfill kërkesën e SHBA’së: Taksa është këtu, mbetet deri në njohje

Kryeministri Ramush Haradinaj ka ripërsëritur se taksa ndaj Serbisë nuk do të hiqet deri në njohje. Në konferencën për gazetarë pas mbledhjes së Qeverisë, Haradinaj ka thënë se kushtëzimi i dialogut me Serbinë, është i pakuptimtë.

“Vendosja e taksës është vendim i Kosovës, arugmentet i kemi tregu, kushtëzimi I dialogut është pakuptim. Është e papranueshme të kushtëzohet dialogu, mendoj se nuk humb vec Kosova por humb krejt rajoni.Taksa është këtu deri në njohje, nuk heqet deri në njohje”, tha Haradinaj, percjell Periskopi.

Ndryshe, ka disa ditë që Shtetet e Bashkuara të Amerikës po kërkojnë heqjen e taksës ndaj Serbisë. E fundit është edhe kërkesa që e transmeton Zëri i Amerikës, e cila sipas VOA’s thotë kështu:

”Shtetet e Bashkuara vazhdimisht e kanë ngritur çështjen e tarifave dhe nevojën e pezullimit të tyre. Udhëheqësit e Kosovës e kanë të qartë seriozitetin e qëndrimit tonë dhe sfidat që paraqesin tarifat për marrëdhëniet e forta dypalëshe ndërmjet Shteteve të Bashkuara dhe Kosovës. Kosova dhe Serbia, thekson më tej zyrtari i lartë, duhet të ndërmarrin veprime dhe vendime të vështira, por të nevojshme, t’u japin përparësi bisedimeve dhe të normalizojnë marrëdhëniet ndërmjet tyre”.

Në muajin nëntor Kosova vendosi taksën prej 100 për qind ndaj mallrave nga Serbia për shkak të qasjes agresive të Beogradit ndaj shtetësisë së Kosovës.

Beogradi e ka kushtëzuar vazhdimin e bisedimeve me heqjen e tarifave, duke bërë që procesi të mbetet i pezulluar.

Shtetet e Bashkuara disa herë kanë bërë thirrje për pezullimin e tarifave, ndërsa javën e kaluar këshilltari për siguri kombëtare i presidentit Donald Trump, John Bolton, bisedoi në telefon me presidentin e Kosovës, Hashim Thaçi, kryeministrin Ramush Haradinaj dhe kryeministrin e Shqipërisë Edi Rama./Periskopi/