Haradinaj pas votimit të Ligjit për Paga: Ditë historike për punonjësit e sektorit publik

Haradinaj e ka quajtur këtë ditë historike, pasi për herë të parë Kosova u bë me ligj për paga, që vendos rregull në sistemin publik.

Si dhe, 70 për qind e punonjësve në sektorin publik përjetojnë rritje të madhe të pagave, sipas kryeministrit.

Lexoni të plotë reagimin e tij:

Ditë historike për punonjësit në sektorin publik. Sot për herë të parë Kosova u bë me ligjin e pagave, që vendosë rregull në sistemin e pagave dhe rreth 70 përqind të punonjësve në sektorin publik po e përjetojnë rritjen më të madhe të pagave të tyre.

Poashtu, me kalimin e pakos së ligjeve për administratën shtetërore dhe për zyrtarët publik Kosova ka shënuar një arritje të madhe, duke përmbyllur një punë intensive të të gjitha institucioneve të vendit, në zbatim të programit të punës së Qeverisë, Planit Kombëtar për Zbatimin e MSA-së, Agjendës së Reformave Europiane dhe Strategjisë Kombëtare për Zhvillim.

Falënderoj deputetët për përmbylljen e kornizës ligjore, që konsiderohet si shtyllë e shtetit dhe funksionimit të tij që i jep vendit qeverisje të mire, zhvillim ekonomik dhe sundim të ligjit, si dhe përafron Kosovën me Bashkimin Europian.
RH. /Periskopi/