Zyrtare: SBASHK’u në grevë

Sindikata e Bashkuar e Arsimit, Shkencës dhe Teknologjisë me anë të një njoftimi për media ka njoftuar se të premten do të mbahet një grevë dyorëshe në arsim.

SBASHK njofton se me anë të kësaj punëtorët e arsimit në Kosovë do të shprehin kërkesën që pagat e dhjetorit t’i marrin në bazë të Ligjit të Pagave.

“Këshilli Drejtues i SBASHK-ut pas diskutimeve të shumta e duke përcjellë zërin e të punësuarve në arsim, kanë autorizuar kryetarin e SBASHK-ut dhe kryesinë që në koordinim me Federatën e Sindikatës së Shëndetësisë dhe atë të Policisë të nisin bashkërisht me veprime sindikale. Duke u bazuar në këtë dhe në koordinim të plotë me këto dy federata të premten (13.12.2019) mbahet grevë dyorëshe paralajmëruese në çerdhe, në Universitete dhe në të dy ndërrimet e mësimit në të gjitha shkollat e Kosovës me kërkesën drejtuar institucioneve që të punësuarit në arsim dhe gjithë të tjerët pagën e dhjetorit ta marrin bazuar në Ligjin e pagave “- njofton Sindikata e Bashkuar e Arsimit Shkencës dhe Teknologjisë

“Greva dyorëshe në çerdhe fillon nga ora 6:30 deri në orën 8:30. Greva në Universitete greva fillon në orën 8 deri në orën 10. Greva në shkollat e Kosovës mbahet në dy orët e para në të dy ndërrimet “.

Sindikata e Bashkuar paralajmëron institucionet përgjegjëse për zbatimin e Ligjit të Pagave, se greva dyorëshe në arsim është alarmi i fundit dhe kushdo që punon për të zhgënjyer punëtorët e arsimit, shëndetësisë dhe të policisë së Kosovës duhet ta di se do të përballet me reagimet shumë më radikale sindikale.