Zharku nuk u arrestua nga Specialja, kjo është arsyeja e vërtetë

Arrestimin e Xhabir Zharkut katër vite më parë e kishte kërkuar në njëfarë forme edhe ish-deputetja e LDK-së, Melihate Tërmkolli, por këtë e kishte thënë duke kërkuar nga Gjykata Speciale që të merret me rastin e ish-kryetarit të Kaçanikut, Xhabir Zharku.

Ajo në RTK gjatë vitit 2015 kishte thënë se Gjykata Speciale përveç krimeve të luftës, duhet të merret edhe me raste si ai i Xhabir Zharkut.

“Edhe pse edhe këto krimet tjera do të duhej të gjykoheshin nga Gjykatat e Kosovës, por që nuk po bëhen, për shkak se deri më tani e kemi parë që në gjyqësorë ka ndikuar politika dhe njerëzit e saj. Mendoj se do të ishte e pranueshme që Gjykata Speciale do të duhej të merrej edhe me rastet si ai i kryetarit të Kaçanikut”, u shprehë ajo.

Tutje, ish-deputetja e LDK-së kishte thënë se ka kërkesa që Specialja të merret edhe me raste siç i ka cilësuar ajo, krime ordinere të pasluftës.

“Ka kërkesa që të shkoi përtej afati të parapamë, është menduar që të zgjatët afati i kohës së kryerjes së veprave për këtë gjykatë me pretendimin që duhet të zgjidhen edhe veprat e vrasjes që janë kryer pas luftës”, përfundoi ajo.

Ndërsa për mundësinë e arrestimit të Zharkut nga Gjykata Speciale, Periskopi ka kontaktuar me nënkryetarin e OVL-së së UÇK-së, Nasim Haradinaj i cili mohoi se arrestimi i tij kishte të bënte me Gjykatën Speciale.

“Xhabir Zharku as nuk është intervistu nga Gjykata Speciale, me aq sa kam unë informacione ky arrestim është bë për një punë të vitit 2010 dhe nuk ka të bëj me Gjykatën Speciale. Ajo që mund të them është se nuk ka qenë e nevojshme të bëhet spektakël arrestimi i tij, ai nuk i ka ik drejtësisë. Edhe për rastin e mëhershëm, Xhabiri është i gatshëm me kthy në shqyrtim prapë nëse është nevoja, ai nuk i ka ik asnjëherë drejtësisë. Kësaj here kanë bë spektakël, e kanë arrestu ne aeroport, ka qenë duke shku me vizitu familjen e tij”, tha Haradinaj për Periskopin.

Se arrestimi i Xhabir Zharkut nuk ka ndodhur me urdhër të Gjykatës Speciale, e mohoi edhe avokatja e Xhabir Zharkut, Albana Kelmendi.

Megjithëse tha se ende nuk mund të prononcohet zyrtarisht sepse nuk i ka shkresat e lëndës, Kelmendi mohoi se kjo ka të bëjë me Gjykatën Speciale.

Sipas konfirmimit të Policisë së Kosovës, Zharku u arrestua për dy vepra penale të cilat dyshohet se i ka kryer në vitin 2010.

Zëdhënësi i Policisë, Baki Kelani ka thënë për Periskopin se Zharku është i dyshuar për dy vepra penale  të vitit 2010 të ndodhura në Kaçanik.

“Sot, më 14.12.2019, Njësia për Hetimin e Krimeve Ekonomike dhe Korrupsionit e Ferizajt, ka arrestuar një të dyshuar për përfshirje në veprat penale: ‘Keqpërdorim i pozitës dhe autoritetit zyrtar” dhe ‘Ushtrim i ndikimit’. Rasti dyshohet se ka ndodhur në vitin 2010 në Kaçanik. Me aktvendim të prokurorit i dyshuari është dërguar në mbajtje për 48 orë”, tha Kelani.

Ndërsa, Prokuroria Themelore ka propozuar që Xhabir Zharkut t’i shqiptohet masa e paraburgimit.

“Sipas kërkesës së Prokurorisë të dorëzuar në Gjykatën Themelore në Ferizaj, ekziston dyshimi i arsyeshëm se i pandehuri Xh.Zh., me datë 23 tetor 2008 në Kaçanik dhe më 10 Shkurt 2010, si person zyrtar- Kryetar i Komunës së Kaçanikut, me qëllim të përfitimit të kundërligjshëm të dobisë pasurore për organizatën e biznesit dhe shkaktimit të dëmit të Komunës së Kaçanikut, ka shpërdoruar pozitën e tij zyrtare, me të cilën do të kryente veprën penale ˝Shpërdorimi i pozitës zyrtare ose i autorizimit˝ nga neni 339 parargafi 1 lidhur me paragrafin 3 të Kodit Penal të Republikës së Kosovës (KPRK)”, thuhet në njoftimin e Gjykatës.

Kujtojmë se Xhabir Zharku në vitin 2011 u dënua me tre vjet burgim për veprën penale të detyrimit dhe armëmbajtje pa leje.

Pas konfirmimit të dënimit, Zharku u largua nga Kosova  dhe për gati 5 vjet e gjysmë ish-kryetari i Kaçanikut dhe ish-zyrtari i PDK-së, qëndroi në arrati në Suedi. /PERISKOPI