3 orë më parëVV e LDK nuk e mbajnë fjalën për arritjen e shpejtë të marrëveshjes, mbesin peng për postin e Presidentit
Periskopi(6 vite më parë)
(6 vite më parë)Posti i Presidentit ka mbetur çështje e pakapërcyeshme, që po e mban peng lidhjen e koalicionit mes Lëvizjes Vetëvendosje dhe Lidhjes Demokratike të Kosovës. Përkundër paralajmërimeve të mëhershme se çështja e ndarjes së pushtetit do të jetë problemi më i vogël mes këtyre dy subjekteve, pikërisht kjo gjë e ka bllokuar zyrtarizimin e bashkëqeverisjes mes […]
Përkundër paralajmërimeve të mëhershme se çështja e ndarjes së pushtetit do të jetë problemi më i vogël mes këtyre dy subjekteve, pikërisht kjo gjë e ka bllokuar zyrtarizimin e bashkëqeverisjes mes dy subjekteve politike të cilat kanë fituar shumicën e votave në zgjedhjet e fundit parlamentare të mbajtura më 6 tetor. shkruan Gazeta Sinjali.
Rrjedhimisht VV dhe LDK nuk po e mbajnë fjalën para elektoratit të tyre për marrëveshje të shpejtë përkundër zotimeve të mëhershme për zyrtarizimin marrëveshjes mes tyre, menjëherë pas certifikimit të rezultatit zgjedhor nga ana e KQZ-së.
Tashmë grupet punuese të të dyja partive kanë harmonizuar programin qeverisës por liderëve të këtyre partive, Albin Kurtit e Isa Mustafës, u ka sharra në gozhdë, kur kanë arritur tek pozita e kreut më të lartë të shtetit.
Kreu i LDK-së, Isa Mustafa kërkon që përveç pozitës së kryeparlamentarit, atë të zëvendëskryeministrit dhe të pesë minstrive, të dakordohen me partinë e Albin Kurtit që edhe pozitën e Presidentit t`i takojë LDK-së sapo t`i skadojë mandati presidentit aktual, Hashim Thaçi, në vitin 2021.
Ndërkaq lideri i LVV-së, Albin Kurti, fillimisht ka këmbëngulur që në tryezë të negociohen vetëm pozitat qeveritare dhe jo posti i Presidentit, i cili sipas këtij subjekti duhet të jetë apartiak.
Të dy liderët, Kurti e Mustafa, as gjatë takimit të mbajtur dje nuk arritën ujdi. Ndërkohë takime të tilla janë paralajmëruar edhe për ditët në vijim për shkak ngecjes në zyrtarizimin e marrëveshjes si pasojë e barrikadimit në qëndrimet e tyre kundërshtuese.
Ndonëse në letër, Presidenti përfaqëson unitetin e popullit të Kosovës, historia 20 vjeçare në Kosovë e ka dëshmuar se pozita e kreut të shtetit përbën simbolin e pazareve politike mes partive politike në pushtet.
Përderisa LDK-ja është përcaktuar të mos lëvizë nga qëndrimi, LVV-ja, ka shprehur gatishmërinë të shkohet në zgjedhje të reja, në rast se negociatat për koalicion dështojnë.
Ndërkohë afati për konstituimin e institucioneve të reja po ecën. Presidenti i Kosovës, Hashim Thaçi ka thirrur për datën 26 dhjetor, seancën konstituive të Kuvendit të Kosovës e cila i paraprinë formimit të Qeverisë së re të Kosovës.
