Vjosa reagon pas kërcënimit me familje: Të ndalen anëtarët e aktivistët nga kjo gjuhë

Nënkryetarja e LDK’së, Vjosa Osmani ka reaguar pas kërcënimit me familje që i është bërë djalit të Isa Mustafës, shkruan Periskopi.

Osmani ka shkruar në FB se kërcënimi i familjeve është sulm ndaj vlerave më të rëndësishme të shoqërisë.

Vjosa Osmani ka bërë thirrje për gjuhë përafruese dhe mirëkuptim ndaj njëri-tjerit.

“Është koha që të gjithë të bëjmë thirrje e të punojmë për gjuhë përafruese e të mirëkuptimit ndaj njëri-tjetrit. Pavarësisht dallimeve politike, ne të gjithë kemi vetëm një atdhe, Republikën e Kosovës, të cilën duhet ta ruajmë e zhvillojmë duke respektuar njëri-tjetrin”, ka shkruar ajo.

Shkrimi i saj i plotë:

Për fat të keq, tashmë gjuha e urrejtjes është kthyer gjithandej në përditshmëri, por kërcënimi i familjeve është sulm ndaj vlerave më të rëndësishme që kemi si shoqëri. Familja është e shenjtë dhe nuk ka dallim politik që arsyeton nxitjen e urrejtjes e të kërcënimeve të tilla.

Është koha që të gjithë të bëjmë thirrje e të punojmë për gjuhë përafruese e të mirëkuptimit ndaj njëri-tjetrit. Pavarësisht dallimeve politike, ne të gjithë kemi vetëm një atdhe, Republikën e Kosovës, të cilën duhet ta ruajmë e zhvillojmë duke respektuar njëri-tjetrin. Prandaj i ftoj edhe përfaqësuesit e tjerë politik që jo vetëm të dënojnë gjuhën kërcënuese por edhe t’i ftojnë aktivistët e anëtarët e tyre për gjakftohtësi, tolerancë e mirëkuptim.