Presioni ndërkombëtar për marrëveshje rritet, por VV vazhdon ta luftojë LDK-në

Zyrtarisht dihet se Vetëvendosje dhe LDK nuk po arrijnë marrëveshje për shkak të pozitës së presidentit të vendit. Vetëvendosje edhe pse e mori postin e kryeministrit dhe gjysmën e ministrive, nuk dëshiron t’i ofrojë partisë së z.Isa Mustafa atë që në një mënyrë ia dhanë qytetarët e Kosovës. Iu kujtojmë se në zgjedhjet e 6 tetorit, LDK-ja nuk i fitoi 10 për qind më pak se VV-ja, por vetëm 1,5 për qind.

Pse atëherë ky ngulmim i partisë së z.Kurti?

E gjithë kjo është rrjedhë e një gabimi të tmerrshëm në interpretimin e rezultateve zgjedhore. Vetëvendosje vazhdon të krekoset se i “ka fituar” zgjedhjet, ndërkohë që realisht ka fituar vetëm përbrenda lojës së krijuar nga politika ditore. Domethënë, doli e para. Por, kjo fitore është vetëm morale sepse sistemi ynë politik i jep asaj me automatizëm vetëm pozitën e kryetarit të Kuvendit, ndërsa jo atë të kryeministrit. Nga ky interpretim mashtrues, kjo parti deklaroi se Albin Kurti ishte zgjedhur nga “populli” për kryeministër. E vërteta ishte e hapur para nesh, por e ndryshme. Kurti i kishte marrë 185 mijë vota, ishte më i votuari, por Kushtetuta nuk e përcakton që kandidati më i votuar për deputet të jetë detyrimisht kryeministër.

Dhe, duke menduar se “kanë fituar” në një anë, dhe se “Albin Kurti është zgjedhur nga populli” kryeministër, VV-ja nuk beson që LDK-së i takon pozita e kryetarit të shtetit.

Nga kjo arrogancë e përçudshme, Besnik Bislimi i VV-së publikoi një ‘sondazh’ sipas së cilit Vetëvendosje do t’i fitonte 42 për qind të votave në rast të zgjedhjeve të reja, ndërsa LDK-ja vetëm 21 për qind. Pra, një kërcënim i hapur, publik, ndaj partisë me të cilën thonë se duan bashkëpunim.

Sidoqoftë, Kurti e Mustafa u takuan sërish. Dhe sërish dolën nga takimi pa duar-shtrëngimin ceremonial të arritjes së marrëveshjes.

Ky takim erdhi pas një jave me presion të shtuar ndërkombëtar. Dy deputetë të partisë së Angela Merkelit, Peter Bauer dhe Christian Schmidt, erdhën në Kosovë dhe u takuan me të dyja partitë duke iu thënë që të bënin marrëveshje sa më shpejt. Një gjë të tillë e bënë edhe shumë zyrtarë tjerë ndërkombëtarë. Por, sa më shumë që presioni ndërkombëtar rritet, aq më shumë po rritet edhe ashpërsia e VV-së dhe LDK-së me njëra-tjetrën.

Ndërkohë u mbajt edhe takimi i radhës i liderëve të shteteve tona fqinje në atë që u quajt “Mini-Schengen”. Kosova e refuzoi ftesën sërish, me Thaçin që deklaroi se përkundër që e kishte mik z.Edi Rama, i duhej që ftesën ta refuzonte.

Ia vlen të përmendim në këtë përmbledhje javore edhe shpalljen e futbollistit të vitit nga Federaa e Futbollit e Kosovës. Ai është Vedat Muriqi, që e mundi Milot Rashicën në fund. /Periskopi