Njohësi i Kushtetutës thotë se Kurtit i duhen 61 nënshkrime për t’u mandatuar nga Presidenti, po ku do t’i marrë ato?

Kështu ka deklaruar njohësi i Kushtetutës njëherësh profesori universitar Mazllum Baraliu.

Baraliu ka qartësuar se partia fituese e zgjedhjeve është e obliguar që të bëjë konsultime me Presidentin nëse i ka apo jo numrat për t’a formuar qeverinë, shkruan Periskopi.

”Kushtetuta thotë që presidenti bën konsultimet e duhura për të qartësuar që partia fituese i ka apo jo numrat për ta bërë qeverinë”, ka thënë ai në KTV.

Kjo duket të jetë edhe arsyeja pse kandidati për kryeministër Albin Kurti, nuk shkoi në takim me Presidentin e vendit Hashim Thaçi, i cili gjatë ditës se djeshme i dërgoi dy ftesa të njëpasnjëshme LVV-së për caktimin e mandatarit.

Por, ku do t’i sigurojë Albin Kurti 61 nënshkrime, duke marrë për bazë faktin se raportet me LDK-në janë në pikën më të ulët, që nga propozimi i LVV-së në mënyrë të njëanshme Glauk Konjufcën për kryetar të Kuvendit.

Duke iu referuar Nenit 84.1, thirrja e djeshme e Thaçit ishte vetëm konsultë, por, s’do ta mandatonte kryeministër Kurtin. Pas konsultës, bëhet mandatimi i mandatarit, ndërsa pas kësaj nis procedura 15 ditëshe e afatit ligjor.

Duket qartë që Albin Kurti është duke u munduar të përfitojë në kohë që këtë herë të mos bëjë gabime në hapa siç bëri me kryetarin e Kuvendit, e ndoshta edhe t’a lusë partinë e Isa Mustafës për arritjen e marrëveshjes për bashkëqeverisje. /Periskopi/