Mustafa: Ka hapësirë për marrëveshje me VV-në, por s’lejojmë të nënçmohemi

Kryetari i LDK-së, Isa Mustafa, ka thënë se ende ka hapësirë për marrëveshje për bashkëqeverisje me Vetëvendosjen në 15 ditëshin.

Megjithatë, ai ka thënë se kjo parti s’lejon nënçmim dhe minimizim të rezultatit

“Jo pse ne kemi ndonjë nevojë të veçantë apo të domosdoshme që të bashkëqeverisim, por sepse qytetarëve të Kosovës u duhet një qeveri. Mirëpo në asnjë rast nuk do të lejojmë që LDK-ja të nënçmohet”, ka thënë ai.

“Ne kemi thënë që do të pranojmë se do të heqim dorë nga secila Ministri e jona mirëpo vota jonë pastaj lidhet me një program qeverisës, me sigurinë qeverisëse, që ajo qeveri të udhëhiqet mirë dhe mbi të gjitha duhet të komunikojmë”, ka thënë Mustafa në Rubikon.

Ai ka thënë se kur është fjala për kryetar të Kuvendit, situata ka qenë ndryshe, meqë si parti e parë VV-ja e ka pasur të drejtën kushtetuese ta propozojë kryetarin, por tanimë ajo nuk ka diçka që i garanton Kushtetuta.

Mustafa po ashtu ka thënë se nuk e japin votën bllanko duke mos e ditur se për çfarë po votojnë./Periskopi/