Kultura i jepet minoriteteve? Shpërthejnë reagimet ndaj VV-së dhe LDK-së

Mirëpo ndarja e kësaj ministrie për minoritetet ka ngjallur reagime ndaj LDK’së dhe VV’së të cilat po synojnë që të arrijnë marrëveshje për të qeverisur vendin.

Ish-këshilltari i Ramush Haradinajt, Halil Matoshi ka shkruar në Facebook se MKRS nuk duhet t’i ndahet komuniteteve pakicë, dhe se sipas tij VV dhe LDK me këtë veprim nënçmojnë trashigimin njerëzore.

“Vërtet këtë vend e ka braktisë shpresa

Pse Ministrinë e kulturës VV e LDK ua lânë komuniteteve pakicë?
E para, pse ka fare pak bugjet e zyret i kanë mbushë ‘full’ me militantë partiakë, kushdo që e ka drejtu këtë ninistri dhe e dyta, këta tipa e nënçmojnë çdo gjâ që trashëgimia njerëzore e cilëson si kulturë shpirtnore, sikur i nënçmojnë e nënvlerësojnë pakicat etnike!?”, ka shkruar Matoshi.

Po ashtu për këtë ka reaguar edhe profesori universitar, Blerim Latifi duke ironizuar se ministria e Kulturës do t’i takojë komunitetit turk.

“Punë e kryer qenka: Kosova Demokratik Türk Partisi, do ta drejtoj Ministrinë e Kulturës!”, ka shkruar Latifi.

Gjithashtu edhe analisti Shkëlzen Maliqi në Klan Kosova ka thënë se ndarja e Ministrisë së Kulturës për minoritetet tregon se ajo është flijuar pasi vëmendja e Vetëvendosjes dhe e LDK-së është te ministritë që kanë më shumë pushtet dhe para.

“Kultura gjithë kohën ka qenë e neglizhuar dhe s’ka qenë prioritet. Të gjithë ministrat kanë qenë të dobët apo të dorës së dytë. Edhe kur kanë qenë disa që kanë pasë ambicie s’kanë pasë mundësi veprimi me buxhetin që e kanë pasë. Tash pa dhimbje e kanë dorëzuar”.

“Kjo me Ministrinë e Kulturës ka mbetur si njëlloj pazari i fundit ku nuk kanë dashur t’ia japin partisë tjetër ndonjë më të rëndësishme dhe e kanë flijuar Kulturën”, ka thënë ai.

Ndryshe, VV dhe LDK janë pajtuar që të zvogëlojnë numrin e ministrive në 12 sosh, duke i ndarë 2 ministri për pakicat, një për serbët dhe një për minioritetet tjera./Periskopi/