Konjufca e Haxhiu në kundërshtim të hapur me njëri-tjetrin: Çka tregon kjo gjë?

Albulena Haxhiu ishte e prerë në qëndrimin e saj. “Nëse LDK-ja insiston në pozitën e presidentit, alternativë mbeten zgjedhjet,” – deklaroi ajo hapur, ashtu siç kishte deklaruar edhe ditë më parë në mënyrë të përsëritur.

Por, i të njëjtit mendim nuk ishte edhe Glauk Konjufca.

I quajturi “Adem Grabovc i dytë” nga analisti Astrit Gashi për shkak të mbrojtjes së Xhelal Sveçlës për kafimin me Marko Gjuriqin tha se Vetëvendosje e kishte në fakt edhe planin B për të arritur marrëveshje me LDK-në.

Konjufca vazhdoi të thoshte se si plani A ishte më ideali dhe se do t’i jepte Kosovës një president të popullit duke e bërë një ndër shtetet më demokratike në Evropë. Por, ai deklaroi se ekzistonte edhe plani B, e në të cilin Kosova “do të vazhdonte traditën e procedurës së zgjedhjes së presidentit që prej vitit 2001”, përcjell Periskopi.

Sidoqoftë, Konjufca nuk përmendi zgjedhjet e reja duke lënë krejtësisht të hapur mundësinë që Kurti të pranonte kushtëzimin e LDK-së për presidentin.

“Marrëveshja do të arrihet në ditën e konstituimit të Kuvendit. Bile, ndoshta edhe më herët,” – deklaroi ai, duke pasur ndërmend pikërisht ditën e sotme.

Por, pse ka një shpërputhje aq të madhe mes dy figurave më të votuara të Vetëvendosjes pas z.Kurti?

Në fakt, del se dyshja e famshme e VV-së, ose të paktën njëri prej tyre, nuk ka të dhëna të sakta në lidhje me rrjedhën e bisedimeve Kurti-Mustafa. E po ashtu, edhe mungesën e transparencës nga liderit të tyre në organet e partisë.

Kujtojmë se deklarata të pasakta në lidhje me bisedimet kishin pasur edhe zyrtarë të LDK-së, po ashtu të painformuar nga lideri i tyre, Isa Mustafa. /Periskopi