U kthehet bumerang: Në Prishtinë shfaqen parulla kundër Vetëvendosjes e Xhelal Sveçlës (Foto)

Subjekti politik Vetëvendosje, përgjatë viteve sa ishte në opozitë, njihej për vendosjen e grafiteve e parullave si kundërshtim për çështje të cilat kjo parti nuk pajtohej, shkruan periskopi.

Por si duket tashmë Vetëvendosje do të përballet vet me grafite të tilla që për adresë kanë partinë e Albin Kurtit.

Parulla kundër Lëvizjes Vetëvëndosje janë shfaqur nëpër rrugët e kryeqytetit, pas fotos që u publikua ditë më parë në medie ku shihej aktivisti i këtij subjekti Xhelal Sveçla duke pirë kafe me të ashtuaquajturin shefin për Kosovë në Qeverinë e Serbisë, Marko Gjuriq, në kuadër të një konference rajonale.

Në këtë konferencë kishte marr pjesë edhe lideri i kësaj partie, Albin Kurti.

Grafitet të cilat janë fotografuar nga një sinjalizues në sheshin “Zahir Pajaziti” përmbajnë parullën “Jo Vetëvëndosje por negociata. Mashtrues dhe nënshtrues” si dhe fotografitë e Albin Kurtit, Xhelal Sveçlës dhe Marko Gjuriqit.

Mësohet se grafite të tilla janë shfaqur edhe në qytetet e tjera dhe janë pjesë e një ndërmarrje të përbashkët të organizuar.

Deri më tash nuk është bërë e ditur se kush i ka bërë këto grafite por që ato përçojnë  mesazh politik , në kohën kur Albin Kurti pritet ta marr përgjegjësinë për drejtimin e Qeverisë së re të Kosovës, në bazë të rezultatit të dalë nga zgjedhjet e 6 tetorit.