Haradinaj: Ishte një vit i vështirë

Kryeministri në detyrë Ramush Haradinaj, i është drejtuar qytetarëve duke thënë se viti që po e lëmë pas nuk ka qenë i lehtë .

Përmes një video në Facebook, ka përmendur çështjet të cilat e karakterizuan vitin 2019.

Kryeministri në detyrë ka përmendur dorëheqjen e tij dhe zgjedhjet e 6 tetorit.

“As për mua nuk ka qenë një vit i lehtë, kemi rënë në ato sfida që na testuan edhe dorëheqja edhe shkuarja në zgjedhje ishin test për Kosovën, test për demokracinë për të gjithë ne. Por e kaluam me sukses. Sot ne mund të themi se jemi më të qëndrueshëm”, ka thënë ai.

Haradinaj ka lavdëruar qeverisjen e tij duke thënë se vendi është forcuar sa i përket rendit dhe ligjit.

“Sot ne mund të themi se kemi pavarësi energjetike, mund të themi se jemi më të fortë në siguri rend dhe ligj. Policia, ushtria, AKI dhe gjyqësori janë më të qëndrueshëm”, ka deklaruar kryeministri në detyrë.

Kreu në detyrë i ekzekutivit ka thënë se sot të gjithë punëtorët si në sektorin publik por edhe privat ndihen me më shumë vetëbesim por, sipas tij, duhet ende punë./Periskopi/