FSSHK dënon ashpër kërcënimin me armë të ftohtë ndaj mjekut kujdestar në Vushtrri

Mjeku kujdestar I.R. gjatë orarit të punës ka trajtuar pacientin N.N. dhe të njejtit i ka ofruar shërbimin shëndetësor konform gjendjes shëndetësore të paraqitur në Urgjencën e QKMF Vushtrri, por edhe përkundër ofrimit të shërbimit shëndetësor ndaj pacientit N.N. familjarët e tij i janë kërcënuar me armë të ftohtë mjekut, thuhet në kumtesë, njofton Klan Kosova.

FSSHK në vazhdimësi ka ngritur zërin e saj për të gjitha rastet e dhunës së ushtruar ndaj punëtorëve shëndetësor, kërcënimeve dhe shantazheve të cilat ndikojnë drejtëpërsëdrejti në ushtrimin e profesionit por edhe ofrimin e shërbimeve shëndetësore.

FSSHK do të përdorë të gjithë autoritetin në mbrojtje të punëtorëve shëndetësor dhe anëtarëve të saj.

Ngrisim zërin tonë, të vendosur që të mbrojmë dinjitetin dhe vlerën njerëzore, që një herë e përgjithmonë këto veprime barbare të ndalen dhe të gjejnë dënimin meritor për kryerësit e këtyre veprimeve.

FSSHK bashkëndjen shqetësimin dhe frustrimin e punëtorëve shëndetësor të cilët ofrojnë shërbime emergjente duke qenë se rastet më të shpeshta të sulmeve po ndodhin në këto shërbime ku cilësia është në nivelin më të lartë duke marr parasysh mënyrën e shpejtë të intervenimit dhe të trajtimit të pacientëve në këto njësi.

Duke parë këtu edhe dështimin e sistemit gjyqësor(sipas shkrimeve kriminelët janë liruar në procedurë të rregullt) FSSHK do të jetë e detyruar që ti ndërmerr edhe masat më radikale që në ditët në vijim të marr vendim edhe për mos ofrimin e shërbimeve emergjente pasi që Ligji në mbrojtje të punëtorëve shëndetësor po dështon, thuhet në kumtesë.