Deputeti i LVV-së: Posti i presidentit duhet të diskutohet pas formimit të Qeverisë

Deputeti i zgjedhur i Lëvizjes Vetëvendosje Mefail Bajqinovci, thotë se çështja e postit të Presidentit, e cila është pika ku nuk po mund të pajtohen dy partitë që synojnë koalicioni LVV e LDK, duhet që të diskutohet pas formimit të koalicionit.

Përmes një postimi në Facebook, Bajçinovci ka thënë se marrëveshja LVV-LDK është ndërtuar mbi parimet për rend e ligj.

Postimi i plotë i Bajçinovcit në Facebook

Duhet të kemi parasysh që marrëveshja politike ndërmjet LVV dhe LDK, është ndërtuar në dy vite opozitarizëm aktiv, ndaj një qeverisje të tmerrshme me të cilën është përballur vendi. Marrëveshja jonë, gurin themeltar e ka rivendosjen e rendit dhe ligjit, ma shqip i bjen çkapjen e shtetit. Çdo bisedë për ndarjen e përgjegjësive shtetrore, duhet të fillojë nga ky parim. Presidenca aktuale është një nga institucionet më të dedikuara në deformimin e sistemit të drejtësisë dhe të sigurisë. Ne duhet të tregojmë kujdes që të mos i qasemi konceptimit të rolit të presidentit në mënyrën e njëjtë sikurse koalicionet e kaluara.

Marrëveshja për Presidentin duhet të sigurojë parime e kritere për profilin dhe vlerat që duhet t’i ketë presidenti i ri. Kjo marrëveshje duhet të arrihet tek pas formimit të qeverisë.

Keto vlera, nuk mund të vihen në kundërshtim me atë për të cilën jemi marrë vesh: ribërjen e shtetit ligjor dhe çkapjen e shtetit.