7 orë më parë“Albini është shpirti im”: A u bë Bahtiri njeriu më i afërt i Kurtit në Vetëvendosje?
Periskopi(6 vite më parë)
(6 vite më parë)Periskopi është munduar të marrë një prononcim nga z.Agim Veliu pas takimit të raportuar të tij me kryetarin e Mitrovicës dhe aktivistin e thjeshtë të Vetëvendosjes, z.Agim Bahtiri por ai nuk e ka çelur telefonin. Sidoqoftë, vlen të pyesim: pse Agim Bahtiri është kaq i rëndësishëm për VV-në? Në fakt, Bahtiri vetëm aktivist i thjeshtë […]
Në fakt, Bahtiri vetëm aktivist i thjeshtë i Vetëvendosjes nuk mund të jetë. Në një mori rastesh ai i është referuar kryetarit të Vetëvendosjes, z.Albin Kurti, si “shpirti im” dhe ka pretenduar se e njeh atë “shpirtërisht”. Madje, kur kishte kaluar në Vetëvendosje ai kishte deklaruar publikisht se “ishte 24 orë në shërbim të Kurtit”.
Por, duket se z.Bahtiri është ngarkuar edhe me një detyrë shtesë nga subjekti të cilit i takon.
Bahtiri u raportua nga Express se ishte parë në një restorant të Milloshevës duke diskutuar me z.Agim Veliu, nënkryetar i Lidhjes Demokratike të Kosovës, përcjell Periskopi.
Nuk dihet se për çka është biseduar në këtë takim, por në fotografitë e siguruara vërehet Veliu në një rast me një qëndrim mjaft të nevrikosur karshi z.Bahtiri.
Më herët ishte raportuar se për lidhjen e koalicionit mes VV-së dhe LDK-së ishin takuar edhe babai i kryetarit të VV-së, z.Kurti, me vëllain e Agim Veliut dhe vëllain e Isa Mustafës. Nuk dihet përmbajtja e këtyre bisedimeve, po ashtu.
Por, pas takimit të dy politikanëve që kanë të njëjtin emër, ka shpërthyer gallata në mediat sociale. Një aktiviste politike e ka quajtur koalicionin eventual mes LDK-së dhe VV-së si “koalicion agimesh” por pa i nënkuptuar këtij koalicioni një kuptim negativ.
Ndërkohë, presidenti Hashim Thaçi u pajtua gjatë ditës së sotme me propozimin e Albin Kurtit që të takoheshin të hënën më 6 janar në Presidencë.
Kujtojmë se z.Veliu është akuzuar nga aktivistët e Vetëvendosjes për afërsinë e tij me figurat e larta të PDK-së, por në anën tjetër, edhe z.Agim Bahtiri në disa raste është fotografuar me kryetarin e kësaj partie, Kadri Veselin dhe presidentin e vendit që ishte kryetar më herët, Hashim Thaçin. Megjithatë, aktivistët e Vetëvendosjes e kanë heshtur afërsinë e aktivistët të tyre të thjeshtë.
Bahtiri kishte qenë njeri i rëndësishëm edhe në lidhjen e koalicionit qeverisës mes partive të PAN-it me AKR-në, parti të cilës i takonte më herët.
Ndërkohë, Agim Bahtiri ka qenë një ndër njerëzit më të zëshëm pas zgjedhjeve të 6 tetorit për arritjen e marrëveshjes me LDK-në duke mos humbur optimizmin pas asnjë takimi jofrytdhënës që ndodhte mes palëve. /Periskopi
