Vuçiq në Paris: Do ta pyes Macronin se a po i pëlqen plani për mini-shengenin ballkanik

Aleksandër Vuçiq do të takojë në Paris presidentin francez, Emmanuel Macron. Vuçiq merr pjesë në Forumin e Dytë të Paqes në Paris, njoftojnë mediat serbe, përcjell Periskopi.

Vuçiq dhe Macron poashtu do të flasin edhe për projektin e ‘mini-Shengenit’, që është nënshkruar mes Shqipërisë, Serbisë dhe Maqedonisë, projekt në të cilin, Kosova ka refuzuar të marrë pjesë.

“Nuk dua të paragjykoj se çka mendon Macron për këtë ide. Por unë do ta pyes atë nëse mund ta kemi mbështetjen e tij për këtë. Do ta pyes për mbështetje sepse nëse kemi mbështetjen e tij, do të krijojmë kushte të reja që do t’i paraprijnë implementimit të marrëveshjes në të ardhmen. Nëse kemi mbështetje, nuk mund ta rrëzojmë një plan të tillë aq leht. Ndoshta, nuk do të kemi diskutime më të rëndësishme sesa tani me Macronin”, i ka thënë Vuçiq RTS-së, përcjell Periskopi.

“Ai ka një energji të jashtëzakonshme dhe mendoj se do të kemi lajme të mira për Serbinë. Dua të dëgjoj nga ai se çka mendon për të ardhmen e Serbisë dhe mendoj se mund të bëjmë disa plane bashkë për të ardhmen’, ka thënë Vuçiq./Periskopi/