Thaçi: Kosova do të dërgojë trupa shtesë të FSK-së në Durrës dhe Thumanë

Presidenti i Kosovës Hashim Thaçi, thotë se ka zhvilluar një bisedë telefonike me kryeministrin e Shqipërisë Edi Rama, me të cilin janë dakorduar që Kosova të dërgojë trupa shtesë të FSK-së për ndihmuar në sanimin e pasojave të shkaktuara nga tërmeti.

Thaçi konsideron se gjendja në pjesët e goditura nga tërmeti vazhdon të jetë e rëndë, ndërsa ka tërhequr vërejtjen se kthimi i njerëzve nëpër shtëpitë e tyre duhet të bëhet vetëm atëherë kur ato janë të sigurta ndaj fatkeqësive të tjera të mundshme.

Presidenti ka theksuar se me vëmendje është duke përcjellë ngjarjet në Shqipëri.

Njoftimi i Thaçit në Facebook:

Gjendja ne Durrës dhe Thumanë të Shqipërisë pas tërmeteve vazhdon të jetë e rëndë. E përcolla më vëmendje mbledhjen e Qeverisë së Shqipërisë dhe konstatimin e gjendjes nga kryeministri Rama. Tani shtrohet nevoja urgjente për sanimin e pasojave që të mos rrezikohet asnjë jetë e njerëzve.

Pas bisedës telefonike me kryeministrin Rama, nga sot Kosova dërgon trupa shtesë të Forcës së Sigurisë, të specializuara për sanimin e pasojave dhe konstatimin dhe evidentimin e saktë të shkallës së dëmtimit të ndërtesave në zonat e goditura nga tërmeti.

Kthimi i njerëzve nëpër shtëpi duhet të bëhet në mënyrë të organizuar vetëm pas konstatimit real që shtëpitë dhe banesat të jenë të sigurta dhe të mos ndodhin fatkeqësi të tjera. HTH