Pas tërmeteve në Shqipëri, dy komuna në Kosovë anulojnë aktivitetet për 28 Nëntor

Dy komuna në Kosovë kanë anuluar të gjitha aktivitet e parapara për shënimin e 28 nëntorit në Kosovë.

Këtë vendin vjen pas tërmeteve që ndodhën në Shqipëri e që ka shkaktuar pasoja të rënda në jetëra njerëzish e dëme materiale.

Komuna e Malishevës përmes një komunikate për media ka  bërë të ditur se  ka ndaluar të gjitha aktivitetet  e parapara për 28 nëntor pas tërmeteve që ndodhën në Shqipëri ku disa persona mbetën të vdekur e shumë të tjerë të lënduar.

“Kryetari i Komunës së Malishevës, Ragip  Begaj,  pasi është konsultuar me organet përgjegjëse komunale, vendosi t’i pezulloi të gjitha aktivitete të parapara për shënimin e 28 Nëntorit. Komuna e Malishevës, solidarizohet me vëllezërit dhe motrat në Shqipëri nga tërmeti i sotshëm  që ndodhi, njëherësh shpreh dhembjen, për ata që humbën më të dashurit e tyre në këtë fatkeqësi natyrore”, shkruhet në njoftim.

Ndërsa edhe komuna e Lipjanit ka marrë vendim të njëjtë.

Përmes një komunikate për media, zyra për informim e kësaj komune njofton se ka anuluar aktivitetet festive në shenjë solidariteti me viktimat e tërmetit dhe familjet e tyre në Shqipëri

“Kryetari i Komunës së Lipjanit, Imri Ahmeti në shenjë solidariteti me viktimat e tërmetit në Shqipëri dhe familjet e tyre, ka anuluar të gjitha aktivitetet festive të parapara të mbahen në kuadër të shënimit të 28 nëntorit. E bashkëndjejmë dhembjen me qytetarët shqiptarë që humbën jetën nga pasojat e termetit. Me këtë rast shprehim ngushllime familjeve me kurajon e perballimit të kësaj humbje, e të kesaj situate. Në keto rrethana në emër të Komunës së Lipjanit, dhe në emër të të gjithë qytetarëve lipjanas shprehim ngushllime gjithë familjeve që humben më të dashurit e tyre”, tha Kryetari Imri Ahmeti”, bëhet e ditur në njoftim./Periskopi/