Mosvet: VV e pakënaqur me anulimin e votave të paligjshme nga Serbia

Me këtë vendim, koalicioni Nisma-AKR ka gjasa shumë të mëdha që të bëhet pjesë e Kuvendit të Kosovës. Pa llogaritur rezultatin nga rinumërimet, Periskopi llogariti se pa 3100 votat e pavlefshme serbe, Nisma-AKR e kalon pragun për 20 vota.

Rrustemi, vendimin e PZAP e quan të jashtëligjshëm dhe e konsideron vendim politik që bie në kundërshtim me vendimet e mëparshme, shkruan Periskopi.

Sidoqoftë, Rrustemi e komenton me “mirë shumë” vendimin për heqjen e votave nga Serbia por shton se ky vendim bie në kundërshtim me vendimet e mëhershme – duke e bërë absurd kundërshtimin e mëhershëm nga Lëvizja Vetëvendosje.

Reagimi i plotë nga Rrustemi:

Kam menduar që PZAP nuk mundet me më befasu më shumë, por jo. Vendimet e sotme që veç ligjore e juridike nuk jane, heshti çdo parim e dispozitë ligjore. Vendime politike, pa asnjë bazë e pa asnjë hetim e verifikim në QNR, që kthejnë mbrapsht gjithçka.

Për tri vota të pavlefshme, PZAP ka shkuar në QNR dhe ka hetuar gjithë ditën, kurse për rreth 1500 kuti dhe largimin nga rezultati të disa votave, nuk kanë marrë as mundin që të vizitojnë QNR-në.

Ne vazhdimisht kemi kundërshtuar mënyren e regjistrimit e votimit nga Serbia. Madje kur të tjerët miratonin, unë kam bërë ankesa në PZAP e deri në Gjykatën Kushtetuese – të gjitha i refuzonin, sepse nuk ju duhej për aranzhmane politike të këtij lloji, por ju duheshin edhe për ta votuar Qeverinë. Tani u kujtuan që t’i heqin votat nga Serbia, mirë shumë. Por çfarë do të bëjnë me vendimet e tyre të mëparshme, të kundërta më këtë e për të njëjtën çështje.

Intenca për ta dëmtuar e devalvuar procesin zgjedhor, janë akti më antikushtetues ndaj demokracisë. E sendërtimi i rezultateve zgjedhore, me vendime politike: hiq një copë aty, e vendos këtu, janë goditje ndaj vullnetit të votuesve./Periskopi