LVV i përgjigjet akuzave të Nismës për kërcënimet në QNR

Nisma Socialdemokrate është ankuar se vëzhguesit e saj kanë vërejtur parregullsi dhe janë duke u përballur me presione nga anëtarët e Lëvizjes Vetëvendosje.

Sipas Nismës Socialdemokrate, përfaqësuesit e LVV-së në KQZ, përkatësisht Nazlie Balaj dhe Adnan Rrustemi vazhdimisht kanë ndërhyrë në tavolinat ku po bëhet rinumërimi i votave, duke kërcënuar dhe shantazhuar stafin dhe vëzhguesit e angazhuar në QNR.

Por Lëvizja Vetëvendosje mohon të ketë ndodhur diçka e tillë. Arlind Manxhuka zëdhënës për media në LVV, i ka thënë Periskopit se deklarimet e Nismës janë të pavërteta.

“Ka qindra vëzhgues aty, thjeshtë po shpifin me ngjall vigjilence nga QNR-ja. Janë akuza  boshe dhe të pavërteta, të cilat  as nuk do kisha dashtë me i komentu”, tha Manxhuka.

Në Qendrën e Numërimit të Rezultateve është duke vazhduar rinumërimi i 1471 vendvotimeve. PZAP dhe Gjykata Supreme i kanë dhënë të drejtë Nismës Socialdemokrate e cila kishte kërkuar anulimin e rreth 3100 votave të ardhura ilegalisht nga Serbia. Ky vendim rezulton se me futjen në Kuvend të koalicionit Nisma-AKR me gjashtë deputetë.

LVV nga ana tjetër do të ketë 3 deputetë më pak, LDK  1 deputet më pak,  PDK minus 1 deputet dhe  AAK-PSD një deputet më pak./Periskopi/