Kush është Shpend Maxhuni? Drejtori i Inteligjencës që dha dorëheqje

Z.Maxhuni gjatë mandatit të tij si i pari i Inteligjencës së vendit ka pasur rol të rëndësishëm në kthimin e 110 qytetarëve të Kosovës nga Siria. Ky operacion ishte zhvilluar në bashkëpunim me forcat amerikane dhe transportimi ishte bërë pikërisht me një avion ushtarak amerikan.

Por, Shpend Maxhuni thuhet të ketë qenë një prej zyrtarëve të lartë që kishte përgjegjësi për deportimin nga vendi të gjashtë shtetasve turq të cilët vendi i tyre i akuzonte për terrorizëm. Kjo u bë një çështje shumë e rëndësishme politike pasi u konsiderua që një veprim i tillë ishte zhvilluar pa dijen e kryeministrit të vendit dhe pas presioneve nga presidenti turk Rexhep Taip Erdoan.

Në atë kohë, Maxhuni ishte pjesë e Policisë së Kosovë si drejtor i saj. Në krye të një prej institucioneve më të besueshme në Kosovë ai ishte emëruar në pjesën e dytë të vitit 2011 nga ish kryeministri i Kosovës, Hashim Thaçi. Në atë pozitë ai kishte pasuar z.Reshat Maliqi.

Gjatë mandatit të tij në Polici të Kosovës, kishte ndodhur incidenti i famshëm me vjedhjen e 25 kilogramëve të arit në dhomën e dëshmive.

Ndryshe, Maxhuni është bërë pjesë e Policisë së Kosovës në vitin 1999 dhe është diplomuar në Universitetin e Prishtinës. Ai ka qenë njeriu kryesor në ndërhyrjen e Policisë së Kosovës në veri të vendit më 25 korrik ku kishte mbetur i vrarë polici Enver Zymberi – i dekoruar post mortem me medaljen hero i Kosovës.

Ai ishte akuzuar nga Lëvizja Vetëvendosje se ishte i afërt me Hashim Thaçin gjatë kohës sa ky ishte kryeministër dhe se babai i tij kishte qenë pjesëtar i autoriteteve jugosllave./Periskopi