Kurti thotë se kryeministrat tjerë kanë vjedhur, nuk e heq nga lista as Isa Mustafën (Video)

Në kohën kur kishte protestuar kundër Asociacionit të komunave me shumicë serbe, Albin Kurti kishte thënë se Isa Mustafa do ta ketë ‘fundin e hidhur në politikë’. E kishte quajtur Isa Mustafën edhe ‘qesharak, po të mos ishte i dëmshëm për Kosovën’.

Mirëpo raportet e dyshes kanë ndryshuar së fundmi (për të mirë), sidomos tani kur partisë Vetëvendosje, si fituese e zgjedhjeve, i duhet një parti tjetër për ta formuar Qeverinë.

Kjo parti, ka qëlluar të jetë LDK-ja e udhëhequr nga Isa Mustafa, ish – kryeministër i Kosovës. Kurti dhe Mustafa, tashmë kanë dëshmuar se kanë harruar fjalorin e ashpër ndaj njeri-tjetrit e madje edhe ofendues, por kryetari i Vetëvendosjes, se fundmi në një deklaratë për median shqiptare, nuk e ka veçuar, dikur ‘qesharakun Mustafa’ e tani ‘profesor Mustafa’ nga kryeministrat tjerë. Të gjithë, thotë Kurti, kanë vjedhur…

Ditë me parë, në emisionin ‘Open’, kryetari i Verëvendosjes Albin Kurti ka qenë i ftuar si kryeministër në ardhje i Kosovës, përballë analistëve të Shqipërisë.Ai është përballur me pyetje të shumëta nga analistët e njohur shqiptar si Henri Çili, Alban Dudushi e Andi Bushati. Në të shumtën e rasteve, Kurti u është përgjigjur atyre në stilin tashmë të njohur nga ai ‘që i kemi provuar të gjithë por jo edhe atë [Kurtin].

Në një moment, kur njëri nga analistët i drejtohet Kurtit, se gjërat që po i premton ai ‘i kanë premtuar dhe janë munduar t’i realizojnë edhe kryeministrat e kaluar të Kosovës’, Kurti është përgjigjur se dallimi mes tij dhe të tjerëve si kryeministra është se ‘ata kanë vjedhur’.

‘Kryeministrat e tjerë kanë vjedhur, kanë vjedhur ata’, ka thënë Kurti në ‘Open’.

Në minutën e 4 e 25 sekonda të videos së mëposhtme Kurti thotë se kryeministrat tjerë kanë vjedhur./Periskopi/