KQZ tregon se sa vendvotime janë numëruar deri tani

Valmir Elezi, zëdhënës nga Këshilli Qendror i Zgjedhjeve, duke folur për Periskopin tha se deri tani janë numëruar 50 vendvotime.

‘’Janë rinumëruar 50 vendvotime gjatë ndërrimit të dytë. Ky proces ka filluar të mërkurën pasdite. Rinumërimi do të vazhdojë sipas planifikimeve’’, tha Elezi.

Qendra e Numërimit dhe Rezultateve është duke punuar në 2 ndërrime si dhe është shtuar numri i tavolinave apo njësive të numërimit nga 23 në 32, në mënyrë sa më shpejt të përmbyllet i gjithë procesi.

Kujtojmë se Paneli Zgjedhor për Ankesa dhe Parashtresa (PZAP ditë më parë ka urdhëruar Komisionin Qendror të Zgjedhjeve që të bëjë rinumërimin e rreth 1.500 vendvotimeve.

Këtë vendim Paneli i gjyqtarëve, i kryesuar nga gjyqtari Rrustem Thaqi, e ka marrë pas shqyrtimit të 52 ankesave të paraqitura pas përfundimit të numërimit të votave të zgjedhjeve të parakohshme parlamentare të 6 tetorit.  Paneli i përbërë prej nëntë anëtarëve, vendimin për rinumërimin e këtyre vendvotimeve e ka arsyetuar me mospërputhjen e të dhënave dhe rezultateve për shkak të gabimit teknik në të shtypur të Formularit të Përputhjes së Rezultateve (FPR).

Sipas këtij paneli, FPR-të nuk janë plotësuar fare te subjekti i parë politik i renditur sepse kanë munguar rubrikat për plotësim si pasojë e një gabimi teknik.Ky Panel ka vlerësuar se mosevitimi i këtij gabimi e bën shpalljen e rezultateve jo të saktë në kuptim të nenit 101 të Ligjit për zgjedhje në të cilin thuhet:“Procedurat e numërimit të fletëvotimeve qeverisen nga objektivat e mëposhtme: saktësia, transparenca, efikasiteti, mundësia për rinumërimin dhe përsëritja e zgjedhjeve dhe mbrojtja e fshehtësisë së votës”./Periskopi/