Kërkon hallallin: Ambasadorja Çitaku raporton vjedhjen e ‘lezetit’ për ndeshjen Liverpool-City

Muaj më parë, Periskopi kishte ‘protestuar’ një status të zonjës Çitaku pasi iu zbulonte lexuesve tanë ‘spoilerë’ të serialit të famshëm Game of Thrones.

Duke shfrytëzuar kohën lokale, e që është të paktën gjashtë orë më vonë, Çitaku kishte shkruar në atë kohë një postim rrëqethës për personazhin Arya Stark, duke i lënë të gjithë kosovarët që sapo ishin zgjuar në mëngjes të shtangur e me pikëpyetje se çka kishte ndodhur.

Më vonë u mor vesh, se Arya kishte qenë heroina e atij episodi.

Por, kësaj here Çitaku pa të drejtë kërkon hallallin tonë pas raportimit të bërë nga Periskopi dhe mediat e tjera online nga Kosova për fitoren e Liverpoolit ndaj Cityt.

Me sa e e di Periskopi, znj.Çitaku është tifoze e Barcelonës dhe përshtatet me kohën evropiane për t’i parë ndeshjet e këtij klubi në Ligën e Kampionëve.

Kësisoj, Periskopi vlerëson që ‘pazari i hallalleve’ i propozuar nga Çitaku është jofer.

Ndryshe, në ndeshjen e sotme mes Liverpoolit dhe Cityt fituan “Të Kuqtë” që i dolën 9 pikë para ekipit të Guardiolas. /Periskopi