Keqtrajtoi disa persona, ngrihet aktakuzë ndaj policit në Suharekë

Prokuroria Themelore në Gjakovë ka ngritur aktakuzë kundër policit me inicialet Xh. K. nga Komuna e Suharekës, i cili siç njofton policia, e ka keqpërdorur detyrën zyrtare duke i keqtrajtuar disa persona.

“Rasti ka ndodhur më 22.08.2018, në Suharekë, ku i pandehuri Xh. K., në cilësinë e zyrtarit policor, keqpërdor detyrën dhe autorizimet publike, duke keqtrajtuar e fyer rëndë personalitetin e të tjerëve, këtu të dëmtuarve H.G., A.G., dhe Q. Xh nga Suhareka. Përderisa të dëmtuarit ishin duke hipur në makinën e tyre në parkingun e një restoranti, i pandehuri fillimisht iu kërkon dokumentet e identifikimit, dhe përderisa njëri prej tyre nuk e kishte me vete dokumentin, i njëjti nervozohet dhe e godet në kokë, ku pastaj të tre të dëmtuarit i hip në makinën e policisë, kështu ku edhe gjatë rrugës për në stacionin e policisë, i ofendon e i godet ata”.

“Pas arritjes në Stacionin policor në Suharekë, i ndan në dhoma të veçanta, ku secilin prej tyre,  duke i kapur për fyti, i shanë e ofendon, dhe i godet me  grushte në kokë, bark dhe gjoks”.

“Prokurori i rastit i ka propozuar Gjykatës Themelore në Prizren, Dega Malisheve, që i pandehuri Xh. K., të dënohet sipas ligjit për veprat penale që i vihen në barrë”, thuhet në komunikatën për media./Periskop/