Dhunë e kaos në Hong Kong, polici gjuan me armë një protestues

Një zyrtar policor ka qëlluar me armë ndaj një protestuesi, gjatë protestës në Hong Kong.

Protestuesit pro-demokracisë në Hong Kong po vazhdojnë edhe sot më 11 nëntor,   ku  për pasojë një zyrtar policor ka qëlluar me armë zjarri ndaj një protestuesi, i cili më pas është dërguar në spital.

Protestat e ditëve të fundit, që kanë hyrë në muajin e gjashtë, janë nxitur nga vdekja e një studenti.

Dhuna është përshkallëzuar gradualisht përgjatë 24 javëve të protestave, në të cilat është kërkuar që Pekini të mos ndërhyjë në liritë dhe të drejtat themelore të Hong Kongut, shkruan BBC.

Aktivistët kanë thënë se autonomia e Hong Kongut dhe liritë civile të stilit perëndimor, të premtuara kur ish-kolonia britanike i është kthyer Kinës më 1997, janë duke u zhdukur me kalimin e kohës.

Tensionet janë rritur sidomos pas vdekjes së një studenti 22-vjeçar më 8 nëntor, i cili ka rënë nga një garazh parkimi, afër hapësirës ku po zhvillohej një operacion policor fundjavën e kaluar, përcjell Periskopi.

Policia nga ana tjetër ka përdorur gaz lotsjellës, ndërsa ka arrestuar 88 persona.

Protestat në Hong Kong janë nxitur në muajin qershor kur qeveria ka prezantuar një projektligj që do të mundësonte ekstradimin e të dyshuarve në Kinë.