Çnjerëzore: Policia e Macronit i përzë si kafshë shqiptarët dhe të tjerët që po flinin në tenda

Qindra policë francezë kanë filluar të heqin mbi 1 mijë emigrantë dhe refugjatë nga kampet e improvizuara në veri të Parisit, ku kanë fjetur në kushte të rënda për muaj të tërë.

Dje Periskopi bëri të ditur se shumë emigrantë shqiptarë janë pikërisht në këto tenda duke përjetuar kushtet e rënda pas ikjes nga Kosova.

Policia mbërriti në vend të ngjarjes para orës 6 të mëngjesit të ditës së sotme, pasi qeveria e Emmanuel Macron vendosi të merrte qëndrim të fortë ndaj emigracionit këtë javë dhe u zotua se do të hiqte ato tenda.

Brenda orës autobusët e parë u panë derisa niseshin për t’i çuar këta njerëz përkohësisht në palestra sportive në rajonin e Parisit ku autoritetet e emigracionit do të kontrollojnë statusin e tyre, përkthen nga The Guardian, Periskopi. Gra dhe fëmijë ishin të parët në radhë, ndërsa burrat prisnin me qetësi që të iknin, me çanta në duar.

Më shumë se 3 mijë vetë po flinin në këto kushte dhe poshtë urave e kanaleve në Parisin verior dhe në Seine-Saint-Denis pa qasje në ujë të pijshëm dhe pa mundësi për t’u larë. Shumë prej tyre ankoheshin nga minjtë.

Politikanët lokalë kanë thënë se problemi është se shteti nuk ofron akomodim dhe kushte për azilkërkuesit që po procesohen.

Kryetarja socialiste e Parisit, Anne Hidalgo, vazhdimisht ka akuzuar qeverinë e Macronit se ka dështuar për t’iu ofruar ndihmë numrit të madh të njerëzve që po flinin në kushte mjeruese në qytet./Periskopi