Blerim Latifi paralajmëron luftëra gjakatare nëse BE-ja mban të mbyllura dyert për Ballkanin

Latifi ka kritikuar “minishengenin ballkanik” si ide duke thënë se ajo është rezultat i faktit se Bashkimi Evropian “përditë e më shumë po dominohet nga pikëpamja për ta mbajtur Ballkanin Perëndimor jashtë strukturave të tij.”

Në këtë pikë ai i referohet rritjes së mbështetjes për partitë anti-emigracion dhe anti-zgjerim në vendet e Bashkimit Evropian, qëndrime të cilat janë përqafuar në një masë edhe nga liderët e dy vendeve më të mëdha, Gjermanisë e Francës, Merkel e Macron, shkruan Periskopi.

Por, z.Latifi paralajmëron se një gjë e tillë mund të sjellë në vendet tona luftërat e tmerrshme që ndodhën më herët.

“Çdo lloj federalizmi, edhe në versionet e tij më të buta, më shumë se zgjidhje, përmban potencialin e përsëritjes së gabimeve të së kaluarës.” – shkruan Latifi.

Më poshtë e keni të plotë dhe të paredaktuar statusin e tij:

Kjo ideja e minishengenit ballkanik duket se është rezultat i faktit se Bashkimi Evropian përditë e më shumë po dominohet nga pikëpamja për ta mbajtur Ballkanin Perëndimor jashtë strukturave të tij.Ideja se Ballkani, edhe pse gjeografikisht është në Evropë, duhet disi të mbahet jashtë saj, është një ide e vjetër, e cila vetëm sa i ka komplikuar çështjet ballkanike. Kur Perandoria Osmane po jepte shpirt, ishte shpikur ideja e një federate ballkanike për territoret e saj në Ballkan. Më vonë komunistët, në krye me Titon dhe liderin e Bullgarisë komuniste, Dimitrovin, dhe me mbështetjen e Enver Hoxhës, kishin punuar seriozisht në një version tjetër të federatës ballkanike. Vetë Jugosllavia ishte produkt i kësaj ideje. Një gjë është e sigurtë: Problemet e Ballkanit nuk zgjidhen duke i përjashtuar vendet e tij nga BE-ja dhe akomoduar në rregullime artificiale federatash. Çdo lloj federalizmi, edhe në versionet e tij më të buta, më shumë se zgjidhje, përmban potencialin e përsëritjes së gabimeve të së kaluarës./Periskopi