Armend Muja për Periskopin: LDK-ja po kalon në pazarllëqe politike, posti i Presidentit të mos i takojë asnjërës parti

Stërzgjatja e procesit zgjedhor  duket se po rrit apetitet për më shumë pushtet në mes dy partnerëve që pritet të formojnë koalicionin qeverisës LVV dhe LDK.

Së fundmi në media është përfolur se Lidhja Demokratike e Kosovës  është duke kërkuar më shumë hapësirë për të qeverisur me partinë e Albin Kurtit, duke kërkuar që në ‘këmbim’ të postit të kryeministrit, LDK të marrë  7 ministri, postin e kryeparlamentarit dhe atë të presidentit.

Për analistët politikë, kërkesat e LDK-së nga ato parimore, po kalojnë në pazarllëqe.

Sipas analistit Armend Muja, LVV e LDK në tentativën për formimin e koalicionit parazgjedhor, të vetmen çështje për të cilën nuk kanë mundur të binë në ujdi, ka qenë posti i kryeministrit.

Sipas Mujës, të dyja partitë  në atë kohë ishin marrë vesh që numri i ministrive t’u takojë të dyjave në mënyrë të barabartë, pra  50 me 50.

E sipas Mujës, në esencë kjo do të duhej të ndodhte edhe tani, pas shpalljes së rezultateve të zgjedhjeve të 6 tetorit, ku parti fituese doli Lëvizja Vetëvendosje.

Analisti Muja dyshon se rritja e apetiteve të LDK-së  ka ardhur për shkak të tri arsyeve.

“Në esencë  u takon që t’i kenë 50 % të mistrive sipas marrëveshjes që e kanë pasur të dyja partitë në parim. Çdo lëvizje përtej kësaj është një përpjekje  për të sabotuar  marrëveshjen paraprake, ose përpjekje për të sabotuar fitoren e një partie tjetër, ose  për ta shndërruar këtë marrëveshje nga ajo parimore, në pazare politike”, ka thënë Muja në një bisedë me Periskopin.

Analisti i njohur ka shprehur edhe habinë se si befas  u vendos në tavolinë edhe çështja e postit të Presidentit nga ana e LDK-së. Duke cituar Kushtetutën e Kosovës, ai është shprehur se posti i Presidentit duhet të reflektojë unitetin e popullit, çka sipas tij do të rezultonte qe asnjëra nga të dy partitë që  mund të jenë në pushtet të mos e gëzojë këtë post, por se presidenti të jetë një figurë unifikuese, i pranueshëm edhe ndërkombëtarisht por edhe nga opozita.

“ Presidenti sipas Kushtetutës së Kosovës, duhet të reflektojë unitetin e popullit. Mendoj që Kosova ka mjaft figura që pozita e Presidentit të jetë përtej këtyre partive politike, një figurë ndërmjetësuese që të jetë e pranueshme  edhe nga opozita”, ka thënë tutje Muja.

Për ndarjen e posteve, asnjëra nga partitë e apostrofuara nuk e ka konfirmuar kërkesën e LDK-së për 7 ministri. Kanë dhënë se kjo çështje nuk është diskutuar asnjëherë ndërmjet takimeve në mes grupeve punuese të të dy partive për programin qeverisës.

Ndërsa kanë konfirmuar se ndarja e posteve do të diskutohet ndërmjet krerëve të partive, atij të LVV-së Albin Kurti, dhe Isa Mustafës të LDK-së.

Disa ditë më parë, nënkryetarja e LDK-së që ishte edhe kandidate për kryeministre nga kjo parti Vjosa Osmani, pati deklaruar se posti i kryeministrit peshon sa 4 ministri. Kësaj deklarate i ishte  përgjigjur nënkryetari  i LVV-së Glauk Konjufca i cili ka thënë se “Për kryeministrin s’ka kundërpesha, e as kalkulime”.

Ndryshe, nga LDK dhe LVV kanë dhënë se gjatë takimeve të grupeve punese janë dakorduar për 90 përqind të programit qeverisës. Ndërsa për ditën e nesërme (e premte) kreu i LVV-së Albin Kurti ka paralajmëruar takimin me kryetarin e LDK-së Isa Mustafën.

Në rast të formimit të koalicionit qeverisës në mes LVV e LDK, një gjë tashmë është e qartë se qeveria e ardhshme do të përbehet prej vetëm 12 ministrive. /Periskopi/

K