Lista serbe deklarohet rreth përfshirjes në qeverinë e ardhshme

Lista Serbe mund të mos jetë pjesë e koalicionit të ardhshëm qeverisës, por jo edhe e Qeverisë. Kështu së paku thuhet në Kushtetutën e Kosovës, e cila ia garanton këtij komuniteti të marrë udhëheqjen e një dikasteri qeveritar në rast të një qeverie me 12 ministri.

Lista Serbe nuk e ka prioritet të bëhet pjesë e qeverisë së ardhshme të Kosovës. Kështu u tha në kumtesën e Listës Serbe pas takimit të nënkryetarit të saj, Dalibor Jevtiq, me senatorin amerikan Ron Johnson.

“Nuk është prioritet që Lista Serbe të hyjë në Qeverinë e re të Kosovës, veçanërisht jo në kushtet dhe në atmosferën në të cilën nuk pranohet nga populli serb në Kosovë”, ka thënë Jevtiqi gjatë takimit.

Ai ka theksuar se në rast se shkelet Kushtetuta e Kosovës në lidhje me procedurën e formimit të Qeverisë pa Listën Serbe, përgjegjësi do të japin formuesit e ekzekutivit.

Tutje në komunikatë thuhet se Jevtiqi i ka thënë senatorit Johnson se përfaqësuesit e Listës Serbe nuk do të jenë pjesë e problemit, por pjesë e zgjidhjes dhe se do të angazhohen për krijimin e kushteve më të mira për serbët dhe për komunitetet tjera.