Gjuriq tallet me Kosovën: 10 me 0 për serbët, pa ne s’ka institucione vetëm në film e ëndrra

Duke e vazhduar jehonën e presidentit të tij Drejtori i të ashtuquajturës Zyre për Kosovë e Metohi të qeverisë serbe Marko Gjuriq tha se Prishtinës do ti duhet të trokas në dyert e serbëve, tek Lista Serbe, nëse duan të formojnë institucione legjitime.

“Me këtë rezultat prej 10 me 0, dhjetë deputetë serbë, cilido që do që në mënyrë legjitime të formojë institucionet duhet të ndalë terrorin, shtypjen e shkeljet, do të duhet që në mënyrë serioze të i qaset edhe bisedimeve me Beogradin. Pa serbët, pa Beogradin, pa popullin tonë të bashkuar, nuk ka institucione legjitime në Prishtinë” tha Gjuriq për televizionin publik serb RTS.

Djuric shtoi se Serbia është treguar se është “kampion në përballje për zgjidhje paqësore” sipas tij kur u pyet rreth vazhdimit të dialogut.

“Na pret një periudhë e rëndë përpjekjeje që dialogu të mbahet në parime të shëndosha e jo siç disa liderë separatistë në Prishtinë mendojnë, që Serbia të detyrohet t’i jap të gjitha, e të mos fitojë asgjë, atë film nuk kanë për ta parë, mund vetëm të ëndërrojnë”, transmeton Gazeta Metro.

Djuric foli edhe për bisedimet ku shpjegoi se rrethanat janë ende të vështira, e nuk duhet të kërcejmë nga gëzimi, por rezultati i zgjedhjeve nga Lista Serbe është shumë i rëndësishëm dhe e lehtëson pozitën e Beogradit.