Trumpi mohon se i ka fshehur detajet e takimit me Putinin

Presidenti i Shteteve të Bashkuara të Amerikës, Donald Trump, ka mohuar se ka fshehur detaje të bisedave me presidentin e Rusisë, Vladimir Putin, duke thënë se “nuk është duke fshehur asgjë nën batanije”.

Gazeta amerikane “Washington Post” ka thënë se presidenti i ka marrë dhe nuk i ka kthyer shënimet e përkthyesit të tij pas mbarimit të bisedimeve në vitin 2017. Përveç kësaj, besohet se takimi dyorësh i tij kokë më kokë me presidentin rus gjatë samitit të Helsinkit nuk është regjistruar fare.

Marrëdhëniet e presidentit amerikan me Rusinë para zgjedhjeve të vitit 2016 janë subjekt i hetimeve të autoriteteve të drejtësisë. Hetuesit po përpiqen të zbulojnë se a ka pasur lidhje mes ekipit të fushatës së Trumpit dhe Rusisë për ta ndihmuar atë që të zgjedhet president i SHBA-së.

Në vitin 2016, agjencitë amerikane të inteligjencës kishin zbuluar se Rusia ka kryer sulme kibernetike dhe ka shpërndarë lajme të rreme në rrjete sociale për t’i dhënë ndihmë Trumpit dhe për ta dëmtuar rivalen e tij, Hillary Clinton, shkruan “BBC”.