Skandaloze! Studentët e FSHMN-së vazhdojnë të mësojnë në bodrumet e Filologjikut

Ka disa vjet që studentët e Fakultetit të Shkencave Matematikore dhe Natyrore, mësimin e zhvillojnë në bodrumet e Fakultetit të Filologjisë, raporton KTV.

E studentët disa herë edhe kanë protestuar duke kërkuar zgjidhje për problemin e tyre.

Shumë herë iu premtua atyre që objekti i këtij Fakulteti do të ndërtohet shumë shpejt, por edhe në vitin 2018 nuk u realizua asgjë.

I pari i Komunës së Prishtinës, Shpend Ahmeti, u ishte përgjigjur thirrjeve të protestuesve lidhur me mosndërtimin e objektit të FSHMN-së, duke u premtuar atyre zgjidhje.

Ahmeti para studentëve pati thënë se ai ka tentuar që të zgjidhë këtë problem në takimet me të gjithë rektorët, si dhe ka propozuar që FSHMN-ja të ndërtohet afër Fakultetit Teknik, aty ku është paraparë të ndërtohet Pallati i Operës. Ai i kishte dërguar edhe një shkresë dekanit të FSHMN-së.

Dekani i FSHMN-së thotë se dokumenti që Shpend Ahmeti u kishte ofruar atyre ishte pa asnjë nënshkrim.

Studentët e këtij fakulteti thonë se e kanë shumë të vështirë mbajtjen e mësimit në këto kushte. Madje, në fotografitë e dërguara nga studentët, shihet se mungon edhe ndriçimi.

Përfaqësuesja e këshillit studentor në këtë fakultete, Dafina Sylaj, paralajmëron bojkot të mësimit në semestrin tjetër nëse nuk merret asnjë masë.

KTV-ja ka provuar të marrë një përgjigje nga Ministria e Arsimit, Shkencës dhe Teknologjisë si dhe nga zyrtarë të Komunës së Prishtinës në lidhje me ndërtimin e objektit të FSHMN-së por ata nuk kanë qenë të qasshëm për televizionin. /Periskopi