Pse kripa është e rrezikshme për foshnjat?

Ekspertët e shëndetit këshillojnë që të mos shtoni asnjëherë kripë në ushqimin e fëmijës tuaj, por a e keni menduar ndonjëherë pse? Ju personalisht a përfshini sasi të lartë kripe në ushqimet e fëmijës?

Pse sasia e lartë e kripës është e rrezikshme?

Trupi i njeriut ka nevojë për kripë që të funksionojë siç duhet. Por nevojat e një fëmije për kripë janë deri në 1 gram në ditë deri në moshën 1-vjeçare. Këto nevoja plotësohen nga qumështi i gjirit ose formula.

Veshkat e një fëmije nuk janë në gjendje të përpunojnë sasi më të madhe kripe se kaq. Shtimi i kripës do të çonte në dëmtim të rëndë të veshkave.

Ekzistojnë gjithashtu fakte se rritja e sasisë së kripës në fëmijëri, rrit shanset për të vuajtur nga hipertensioni më vonë.

Në vend që të shtoni kripë në ushqimin e foshnjës, provoni të shtoni përbërës aromatikë, të cilët japin shije, por janë edhe të ushqyeshëm si erëzat e ndryshme.

Kujdes!

Kur përgatisni formulën, lexoni me  vëmendje sasinë që duhet të përdorni. Nëse është shumë e koncentruar, ajo përmban shumë kripë.

Kontrolloni etiketën e çdo produkti që blini për t’u siguruar sa kripë përmbajnë.