Policia flet për mbrojtjen e Hahn gjatë vizitës së tij: Gjithçka shkoi sipas agjendës së paraparë

Vizitat e personaliteteve të tilla  kërkojnë një siguri të lartë shtetërore. Ndonëse disa media vendore sot kanë raportuar se Hahn kishte refuzuar përkujdesjen e sigurimit nga autoritetet e sigurisë kosovare, duke kërkuar vetëm praninë e EULEX’it, Policia e Kosovës pohon se ishin në dispozicion të plotë.

Periskopi ka kontaktuar me Policinë e Kosovës, të cilat sqarojnë se edhe për këtë vizitë kanë angazhuar të gjitha njësitet relevante për mbarëvajtjen dhe garantimin e sigurisë së përgjithshme. Sipas tyre, gjithçka ka shkuar sipas agjendës.

‘’Policia e Kosovës eshte institucioni kryesor per garantimin e rendit dhe sigurise publike ne vend. Sikurse edhe në te kaluaren gjatë vizitave te personaliteteve te larta nderkombtare Policia e Kosoves edhe me rastin e kesaj vizite me njesitet e saj relevante ka ndermarr te gjitha veprimet e nevojshme per mbarëvajtje të vizitês dhe garantim te sigurise se pergjithshme. Perderisa cdo gje gjate realizimit te kesaj vizite ka shkuar sipas agjendës’’, thuhet në përgjigjen e Policisë për Periskopin.

Hahn iku nga Kosova pa asnjë deklaratë të vetme para mediave. Vetëm pas disa orësh, ai shkroi në Twitter.

Hahn ka thënë se ka pasur një takim dhe diskutim të mirë me kryeministrin Ramush Haradinaj, dhe me ministrat e tij. Si dhe ka folur për avancim të rrugës evropiane të Kosovës, por jo konkretisht edhe për taksën dhe liberalizimin e vizave. Kjo e fundit u përmend nga kryeministri Ramush Haradinaj.
“Vizita e parë e 2019 në rajon: Prishtina e bardhë, kisha një bisedë të hapur e të mirë me kryeministrin Ramush Haradinaj. Jemi duke shikuar para për të punuar ngushtë në lidhje me çështjet e mbetura këtë vit, ashtu që Kosova të avancojë në rrugën e saj në BE”, ka shkruar Hahn.

Ndërsa Haradinaj anën tjetër tha se me Hahn ka biseduar për liberalizimin e vizave. Ani pse vetë Hahn ishte ai që pati deklaruar se nuk mund të flitet për vizat deri në vitin 2020. /Periskopi/