Mustafa i del në mbrojtje Teuta Rugovës: Nuk lejojmë që Dardan Gashi ta bëjë objekt të sekserizmit

Kryetari i Lidhjes Demokratike të Kosovës, pas takimit me grupin parlamentar, ka folur për deputeten e kësaj partie, Teuta Rugova, dhe për zëvendëskryeministrin Dardan Gashi.

Zëvendëskryeministri Gashi ditë më parë në një intervistë dhënë për KTV-në kishte deklaruar se në Qeveri ai e përfaqëson votën e Teuta Rugovës, vajzës së Presidentit të ndjerë Ibrahim Rugova, deputete e LDK-së.

Për ish-kryeministrin Mustafa, Dardan Gashi është një sekser dhe nuk do të lejohet që një deputete e LDK-së të jetë objekt i sekserizmit.

“Ne jemi parti më demokratike sesa janë tjerët dhe kemi kultivu relacione të brendshme deri te dhënia e lirisë deputetëve të votojnë, qysh u takon me Kushtetutë dhe rregullore të Kuvendit. Nëse Dardan Gashi thotë së është sekser, atëherë ne nuk guxojmë të pranojmë që një deputete e një familjes së nderuar të jetë objekt i sekserizmit. Është përgjegjësi e tyre edhe Dardan Gashit që thonë se e përfaqëson një votë të LDK. Asnjë votë të LDK nuk e përfaqëson Dardan Gashi”, tha Mustafa në konferencën për media.
Deputetja Teuta Rugova ishte e pranishme në takimin e sotëm të grupit parlamentar të LDK-së me kryetarin dhe nënkryetarët e partisë. /Periskopi