Mjeku i reagon Ministrisë: Po shpifni, jeni të padijshëm dhe të padrejtë

Getoar Mjeku, i riu kosovar që ka përfunduar studimet në Shtetet e Bashkuara të Amerikës, ka reaguar pas reagimit të mëparshëm të Ministrisë së Arsimit që thoshte se diploma e tij nuk është e barazvlefshme me doktoraturën, shkruan Periskopi.

Mjeku e cilëson kumtesën e Ministrisë si “shpifëse, që shpërfaq mosdije dhe që thellon padrejtësinë”.

Ai paralajmëron hapa të tjerë ndaj saj.

Lexoni të plotë reagimin e tij:

Ministria e Arsimit paska reagu rreth diplomës sime përmes nji kumtese që shpif, shpërfaq mosdije, dhe thellon padrejtësinë.

Ministria më ka marrë gati dy vjet kohë me vendosë rreth diplomës sime dhe me dhanë arsyetim për vendimin. Ka lëshu dy akte (nji në shkallë të parë dhe nji në të dytën), por arsyetim nuk ka dhanë. Kjo punë tani ka pi ujë: procedura pranë ministrisë ka mbaru, dhe ka nisë rasti në gjykatë. Çkado që thotë ministria nëpër gazeta asht mend mbas kuvendit, dhe nuk pranohet. Nuk e ka çelë gojën për gati dy vjet, e tash don me u nxjerrë mbrenda natës.

Por edhe sikur të kish dalë me kohë, kumtesa e sotme nuk qëndron. Ministria thotë se diploma ime dallon nga nji lloj tjetër i doktoratës. Unë asnjiherë nuk i kam mohu dallimet mes sistemeve arsimore ose se ka lloje të ndryshme të doktoratave. Por të gjitha dëshmitë thonë se Amerika e çmon doktoratën time si të barazvlefshme me nji PhD. Këtë aspekt ministria nuk e ka trajtu as tani, ani pse ligji e detyron që kur nuk merr parasysh nji pretendim të palëve me tregu pse.

Reagimin e ministrisë e lexova në portalin Insajderi: http://bit.ly/2BYPIcx.

Vendimi i saj, megjithate, mbetet i paligjshëm dhe diskriminues. Tetë vjet të studimeve nuk barazohen me katër vjet, andaj unë s’do të heq dorë nga ajo që më takon. Unë po kërkoj që në Kosovë me i gëzu të drejtat që i gëzoj në Shtetet e Bashkueme.

Për hir të korrektësisë, po i postoj vendimin për njohjen e diplomës, vendimin për refuzimin e ankesës (që jep gabimisht datën e ankesës dhe numrin e protokollit), dhe dy letrat e universitetit për vlerën e diplomës. Kurse padinë dhe plotësimin e padisë ndaj ministrisë i gjeni këtu: http://getoar.com/padi/.

Do t’ju njoftoj edhe për veprimet e mia ndaj Ministrisë së Drejtësisë, që ma ka refuzu kërkesën me hy në provimin e jurisprudencës.

Prej se kam nda publikisht shqetësimin tim rreth diplomës, kam marrë përkrahje të jashtëzakonshme prej miqve, kolegëve të ndershëm, dhe qytetarëve të drejtë. Ju jam thellësisht mirënjohës.