Mirena: Qeveria të gjejë zgjidhje për taksën në bashkëpunim me amerikanët, askush s’i fajëson nëse hiqet

Mirena, në Zonën B në Klan Kosova ka deklaruar se në një momentum të tillë, askush nuk do ta fajësonte Qeverinë për marrjen e këtij vendimi.

“Kjo është kërkesë e Shteteve të Bashkuara të Amerikës në mënyrë që dialogu të vazhdojë”, ka thënë Mirena.

Tutje, ai nuk është pajtuar me idenë e ministrit të Diasporës, Dardan Gashi, i cili është pjesë e ekipit negociator në Bruksel dhe kërkoi nga opozita që të nxirrte mocion në Kuvend, në të cilin do të votohej për heqjen e taksës.

Mirena deklaroi se kjo kërkesë është absurde, pasi sipas tij, Qeveria do të duhej të dilte vetë nga situata që ka krijuar për taksën.

“Ky është një lëmsh në të cilin Qeveria e ka futur vetë. Dhe po duket se sa herë po sillet, po pështjellët më shumë”, shtoi ai.

“Nuk do të duhej të përjetohej si disfatë heqja e taksës”.

Sipas tij, zhvillimet politike në vend ka ndikuar në qëndrueshmërinë e Qeverisë Haradinaj.

“Presioni për taksën që po rritet, për një pjesë të Qeverisë mund të jetë një momentum i favorshëm që dikush të dalë prej Qeverie, me një trofe”, deklaroi ai.

“Kjo taksë është duartrokitur në fillim. Dhe mendoj që ka ndikuar në vetëdijesimin e njerëzve për mos blerjen e produkteve serbe, si dhe ka përcjell një porosi tek ndërkombëtarët se edhe Kosova din me shkaktu probleme.  Nuk është e turpshme, as dobësi, që në marrëveshje me ShBA’në me gjet një zgjidhje për dalje nga kjo situatë. Ka situata të tjera që taksa të mbetet në fuqi, si për shembull vetëdijesimi i popullatës”, përfundoi ai./PERISKOPI