Gjermanët lusin Britaninë: Mos dilni nga BE, do të na mungojnë birrat e çaji me qumësht

Annegret Kramp-Karrenbauer, e cila muajin e kaluar fitoi zgjedhjet në CDU, u bashkua me disa figura të rëndësishme të politikës, biznesit dhe kulturës, në një letër të hapur të shkruar për The Times, argumentoi se pse Britania nuk duhet të largohet nga Blloku.

“Britania është pjesë e asaj që ne e krijuam si evropianë” – shkruhej në letër. “Do të na mungonte Britania e madhe nëse do të largohej, sidomos në këto kohë të vështirë. Prandaj britanikët duhet ta dinë: ne u kërkojmë nga thellësia e zemrës që të qëndrojnë”.

Ne letër thuhet se ata respektojnë zgjidhjen e popullit britanik për t’u larguar nga BE’ja, por nëse Britania vendos të qëndrojë, dera për ta do të jetë gjithmonë e hapur.

Duke iu referuar historisë së përbashkët të dy vendeve, grupi tha se Britania nuk ishte dorëzuar pas Luftës së Dytë Botërore dhe kishte mirëpritur sërish Gjermaninë në komunitetin evropian, pavarësisht të gjithave. Gjermanët nuk e kanë harruar këtë, andaj u jemi mirënjohës” – thuhej në letrën e tyre tutje.

“Megjithatë, nëse Britania vendos përfundimisht të largohet nga Bashkimi Evropian, atëherë ta dinë se gjithmonë do të ketë miq në Gjermani e Evropë”, thanë ata. “Por, britanikët duhet ta dinë se ne besojmë që asnjë zgjidhje nuk është e pakthyeshme”.

“Neve do të na mungojë humori i zi legjendar i britanikëve dhe shkuarja në pijetore pas orarit të punës për të pirë një birrë. Po ashtu, do të na mungojë çaji me qumësht dhe ngasja e veturës në anën e majtë. Si dhe, nuk do të shohim më pantonime për Krishtlindje”.

“Por, mbi të gjitha, neve do të na mungojnë njerëzit e Britanisë – miqtë tanë” – vazhdon letra e tyre.

Kramp-Karrenbauer ishte nënshkruesja e parë e letrës, por aty u bashkuan edhe politikanë të tjerë, përfshirë kreun e Partisë Social Demokratike, Adrea Anhles, bashkëkryesuesit e të Gjelbërve dhe kreun e Komitetit për çështje të jashtme të Parlamentit gjerman.

Në listën e nënshkruesve përfshihej edhe Presidenti i Federatës Gjermane të Industrisë, drejtues të lartë të Daimler dhe Airbus, si dhe figura sportive dhe kulturore, si ish-futbollisti gjerman Jens Lehmann dhe Këngëtarja Campino.

Kërkesa erdhi disa ditë pasi në Berlin parashiheshin pasoja katastrofike nëse nuk arrihej marrëveshja e BREXIT’it dhe sinjalizohej për mundësinë e qëndrimit të Britanisë së Madhe në BE.

Gjatë ditës së djeshme, Parlamenti gjerman miratoi një ligj mbi tranzicionin e Brexit’it, i cili do të hyjë në fuqi vetëm nëse fillon kjo periudhë e tranzicionit,e paraparë të zgjasë deri në fund të vitit 2020. Ministri i jashtëm gjerman, Heiko Mass tha se tani topi është të britanikët dhe se koha për lojëra ka mbaruar.

Pas votimit kundër Brexit’it nga Parlamenti Britanik, Kramp-Karrenbauer tha se Gjermania asnjëherë nuk do t’ia bllokojë rrugën, nëse Londra vendos të qëndrojë në BE. /PERISKOPI