Ahmeti komenton vizitën e Putinit: Serbia po glorifikon një regjim autoritar

Kryetari i PSD-së, njëherit i komunës së Prishtinës, Shpend Ahmeti, ka komentuar mbi vizitën e presidentit rus Vladimir Putinit në Serbi. Kjo sipas tij po e glorifikon një regjim autoritar.

Ahmeti tha se shtete e Ballkanit Perëndimor duhet të orientohen nga Bashkimi Evropian dhe Serbia ti jap urgjentisht përparësi demokratizmit të saj dhe vlerave universale të të drejtave të njeriut.

Lexojeni postimin e plotë të tij në Facebook:

Vizita e sotme e Presidentit rus Vlladimir Putin në Beograd e shpërfaq më së miri nevojën urgjente të demokratizimit të Ballkanit Perëndimor. Glorifikimi i regjimeve autoritare nga Serbia shtetërore e cila po përballet po ashtu me protesta masive qytetare kundër autoritarizmit po dëshmon se rajoni, e sidomos Serbia, duhet t’i jep urgjentisht përparësi demokratizimit të saj dhe vlerave universale për të drejtat e njeriut. Bashkimi Evropian nuk duhet të jetë synim vetëm se për investime dhe për zhvillim ekonomik, por sidomos për vlerat e saj për demokracinë dhe për të drejtat e njeriut.
Fryma dominuese shoqërore dhe deklaratat e krerëve të Republikës së Serbisë lidhur me vizitën e Presidentit rus Vlladimir Putin në Beograd vërtetojnë edhe më shumë se njohja e pavarësisë së Republikës së Kosovës, anëtarësimi i saj në Organizatën e Kombeve të Bashkuara dhe integrimi euro-atlantik, të përfshira në Rezolutën e Kuvendit të Republikës së Kosovës për dialogun me Serbinë, janë jo vetëm kushte të domosdoshme për marrëveshjen eventuale midis Kosovës dhe Serbisë, por edhe garanca për paqen e demokracinë në Ballkanin Perëndimor dhe në kontinentin evropian.
Pas normalizimit të marrëdhënieve midis Maqedonisë dhe Greqisë, normalizimi i marrëdhënieve midis Kosovës dhe Serbisë është një shansë për një rajon të nesërm të paqëtuar, të demokratizuar dhe të zhvilluar. Për një realitet tjetër nga atë që po e shohim sot në Beograd.