Veseli: Nëse ne nuk japim leje, këmba e Vuçiqit nuk shkel në Kosovë

Veseli ka thënë se edhe nëse Vuçiqi vjen në Kosovë, ai nuk ka pse të shkojë tek Liqeni i Gazivodës.

Ndërsa ka thënë se ai ka leje, nëse vendos të vie në Kosovë.

“Me Vuçiqin e kemi lehtë. Me Serbinë e kemi lehtë kur jemi bashkë. Vuçiq duhet ta dijë se nëse e vendosim që ai të mos vijë, nuk do të futet në Kosovë. Ajo çfarë jemi duke menduar është situata e bashkëqytetarëve që të bëjë me liberalizimin e vizave, me partnerët tanë perëndimor, por të mos ishte kjo situatë, edhe Vuçiq le ta dijë që as këmba nuk i kish shkel në Kosovë. Le ta provon pa leje, nëse po mundet me u fut”, ka thënë Veseli.

Ai ka thënë se situata e këtyre ditëve tregon më së miri se politikat destruktive nuk prodhojnë asgjë.

“Situata e këtyre ditëve ka treguar se politikat destruktive nuk prodhojnë asgjë. Përveç konfliktit i cili bartet edhe te qytetarët tanë. Kjo situatë e sotme tregon se nuk është mirë me folë fjalë të mëdha, e fjalë të rënda për të treguar fuqinë ndaj njëri-tjetrit, por më mirë është të ulemi bashkërisht e të diskutojmë për çështjet për të cilat kanë të bëjnë me shqetësimin e qytetarëve”, ka thënë ai.

Ai ka kërkuar që opozita të kërkojë falje publike për fjalët e rënda, që sipas tij kanë përdorur.

“Fjala e rëndë nuk thuhet e para. Nuk fyhet një njeri e as një koalicion qeverisës. Gjuha e papranueshme është përdorur, duhet kërkuar falje. Të bëhemi bashkë në një seancë ku secili e shfaq patriotizmin e vetë me punë, e jo me fjalë të mëdha”, tha tutje ai./Periskopi