Thaçi e cilëson sulmin e 11 shtatorit si ‘të shëmtuar’

Kryetari i Kosovës, Hashim Thaçi ka përkujtuar sulmin terrorist të 11 shtatorit duke e cilësuar atë si ‘të shëmtuar’. Për nga ana estetike, ndoshta sulmi mund të cilësohej edhe ‘i bukur’ por çështja qëndron te dhimbja që shkaktoi dhe te politikat e tmerrshme të sigurisë që ShBA-të i vendosën më vonë, shkruan Periskopi.

Sidoqoftë, Thaçi ka theksuar që Kosova është pjesë e aleancës globale kundër fundamentalizmit, ekstremizmit dhe terrorizmit.

Këto janë fjalët e tij:

“U bënë 17 vjet nga sulmet terroriste të 11 shtatorit 2001, në Shtetet e Bashkuara të Amerikës. Këto sulme të shëmtuara ishin kundër vlerave perëndimore të civilizimit dhe tërë botës demokratike. Viktima të tyre ishin shtetasit e mbi 70 vendeve të ndryshme të botës, që sot e tërë bota i kujton. Edhe populli ynë bashkëndjen me të gjithë popujt që humbën më të dashurit e tyre në këto sulme barbare që tronditën botën. Kosova, si pjesë e aleancës globale të krijuar më pas, është munduar gjithmonë të japë kontributin e saj në këtë luftë të pandalshme kundër fundamentalizmit, ekstremizmit dhe terrorizmit”, ka shkruar Thaçi.