Selmanaj: Këto katër parti janë pro ndarjes së Kosovës

Përmes një shkrimi në rrjetin social Facebook, Selmanaj ka deklaruar se këto katër parti janë të kapura nga Thaçi, dhe se këtë e kanë dëshmuar me veprimet e ndërmarra në Kuvendin e Kosovës.

“Skena politike po qartësohet çdo ditë e më shumë. Në njërën anë janë partitë opozitare LDK-VV-PSD dhe Alternativa që janë kundër idesë për ndarje apo shkëmbim territori, kurse në anën tjetër partitë në pushtet PDK-AAK-Nisma -AKR dhe pakicat pro idesē fatkeqe për Kosovën”, ka thënë Selmanaj.

“Bojkoti që po i bënjë partitë në pushtet seancës së thirrur nga opozita e dëshmon qartazi këtë qëndrim… ata edhe pse në publik deklarohen ndryshe, në realitet tregojnë se janë të kapur dhe të udhëhequr nga Hashim Thaqi!”.

Ai ka thënë se nuk është në dorën e pozitës që të marrë vendim për mbrojtjen e sovranitetit të Kosovës, pasi siç ka thënë deputeti i LDK-së, opozita e vetme nuk arrin ta bëjë as kuorumin për seancat parlamentare.

“E kanë gabim ata që mendojnë që opozita si e vetme ta bëjë kuorumin dhe ta mbrojë sovranitetin dhe kufijt e vendit. Po ta kishim ne shumicën sot, kësaj qeverie nuk ja kishim falë dakikin, ja kishim heq popullit prej qafe pa mendu dy herë..”, deklaroi Selmanaj.

Selmanaj u shpreh se “Kadria, Ramushi dhe Fatmiri nën urdhrat e Hashimit kanë vendos që të ikin nga Kuvendi, duke u bërë vendi i pashembullt për demokracitë, ku shumica ikë nga Kuvendi”.