Rrëfimi i të riut nga Kosova, punimi i të cilit mbërriti në duart e Papa Franceskut në Vatikan

Çivlaku në një prononcim për Telegrafin tregoi se sa zgjati puna e tij, që sot e zotëron Papa Francesku, në Vatikan.

“Ky punim më është besuar mua i cili iu dhurua Papa Françesku-t, gjatë një vizite në Vatikan nga Arqipeshkvi i Tivarit, shkelqësia e tij, Imzot Rrok Gjonlleshaj. Punimi u realizua nga data 27 gusht deri më 31 gusht në teknikën Teleisje (filigran), me një gjatësi 11 cm në mënyrë vertikale dhe 8 cm në atë horizontale, me një gurë carniol apo ahat në mes”, tha ai.

I riu nga Peja, tha se ky punim të cilën e ka bërë ai, nuk është ndër të parët i cili është punuar nga familja e tij e më pas dhuruar për klerikët e Vatikanit.

Ai theksoi se babai i tij, Rafael Çivlaku ka punuar dy kryqe për Papa Gjon Palin e II-të, në vitin 1995.

“Për Papa Gjon Palin II, kemi punuar dy kryq. Një për papa Gjon Palin e II-të dhe një për sekretarin e tij në vitin 1995 nga babai im Rafael Çivlaku dhe Viktor Gashi. Kryqi asokohe iu dhurua Papës Gjon Palit II-të, nga vajza e Viktor Gashit. Dhe një kryq jo para shumë kohe iu dhurua Papa Franceskut të tanishëm, e ai kryq ishte i punuar nga familja Çivlaku nga Peja, në fillim të shek XIX”, tregoi tutje Çivlaku.

Anton Çivlaku, pos që ka trashëguar këtë zanat nga familja e tij, ai studion në Akademinë e Arteve, dega muzikë e përgjithshme.

“Për këtë zeje kam pasur interesim që i ri dhe pak nga pak e pata përvetësuar. Mirëpo pas disa takimesh që i pata me ambasadoren gjermane Angelika Viets, ku ia prezantova disa ekzemplare nga Peja si dhe më pas më është bërë ftesa nga ambasadori i Mbretërisë së Bashkuar në Kosovë, Rouari O Conell, ku prezantova po ashtu disa ekzemplare, si dhe pas disa emisioneve televizive, mu shtua një dëshirë edhe më e madhe. E shikoja që kisha ende shumë boshllëk brenda sa i përket zejes dhe historikut të familjes sime dhe që nga ajo kohë, tash e afro 10 muaj mu zgjua një dëshirë dhe po e shoh si nevojë që të hulumtoj sa më shumë për këtë zeje si dhe për historikun e familjes sime”, tha Çivlaku.

Ai po ashtu tha se këtë zeje e sheh si pasuri të popullit, nga e cila janë stolisur brez pas brezi gjenerata të ndryshëm, nga duart e arta të argjend-punuesve.

“Dëshira ime është që të ruhet sa më shumë dhe të trajtohet në mënyrë të veçantë”, shtoi ndër të tjera i riu nga Peja, Anton Çivlaku.

Ndryshe, familja Çivlaku nga Peja është njëra ndër familjet më të vjetra në Kosovë, që merret me këtë zeje.