Nxënësi shembullor nuk pranohet nga shkolla e mesme në Prishtinë

Me një dëftesë me nota shembullore dhe pa asnjë përgjigje për mospranimin e tij në shkollë të mesme, familja u është drejtuar mediave për ndihmë.

Besforti, një nxënës shembullor që ka mbaruar mësimin fillor në Shkollën Fillore “Elena Gjika”, ka aplikuar në Shkollën e Mesme të Mjekësisë “Ali Sokoli”.

Pas mospranimit të tij, atij i është thënë së është në listë të pritjes, po ende nuk ka marrë ndonjë përgjigje për fillimin e mësimit.

Familja e Besfortit është ankuar në Drejtorinë Komunale të Arsimit në Prishtinë dhe në Ministrinë e Arsimit, Shkencës dhe Teknologjisë.

Sipas tyre, këto ankesa nuk janë shqyrtuar nga asnjëri institucion dhe ai vazhdon të mos ketë kurrfarë përgjigje.

Por, ndryshe thotë komuna e Prishtinës.

“Emri i nxënësit është i dhjeti me radhë në listën e të papranuarve (që quhet ndryshe edhe listë e pritjes). Renditja në listë bëhet sipas pikëve që i kanë nxënësit. Siç ndodh në nivel vendi, poentimi bëhet me formulë, ku hyn suksesi gjatë viteve paraprake të shkollimit; pikët në testin e arritshmërisë dhe suksesi në lëndët përkatëse për shkollën/drejtimin që synon, e të ngjashme. Bazuar në këtë, ankesa e nxënësit në fjalë nga Drejtoria Komunale e Arsimit është cilësuar si e pabazuar”, ka thënë Adonis Tahiri, zëdhënës në Komunën e Prishtinës.

Përndryshe, mohimi i arsimit të mesëm konsiderohet shkelje e të drejtave të njeriut dhe familja e Besfortit kanë thënë se këtë radhë, do të ankohen tek Avokati i Popullit.

Pa përmendur emra, Besforti ka treguar për shumë nxënës të pranuar, e me sukses më të dobët se ai.