Kushtet e mjera të punëtorëve në Kosovë, ja si punon ky person pa asnjë masë mbrojtëse (Foto)

Shumë shpesh ka pasur raportime për vdekje që janë shkaktuar nga lëndimet që punëtorë të caktuar kanë marrë gjatë kryerjes së punës së tyre në sektorin privat.

Mungesa e mjeteve mbrojtëse të punës, siç është helmeta, skelet dhe masave të tjera esenciale,  kanë bërë që shumë të rinj ta pësojnë duke u munduar që të nxjerrin kafshatën e bukës me punë të tilla, raporton Periskopi.

Periskopi ka siguruar disa fotografi teksa sot një punëtor është parë në një gjendje mjaft të rrezikshme duke punuar në një ndërtesë në Gjilan.

Nga pamjet shihet se lartësia është mjaft e madhe, ndërkohë që punëtori nuk ka masat mbrojtëse siç është helmeta apo edhe skelet, si mjete pune. Përveç kësaj, personi në fjalë  po punonte në temperatura mjaft të larta.

I riu, Milor Belegu është viktima e fundit që ka humbur jetën në vendin e tij të punës. Ai edhe pse u aksidentua më 19 gusht, për një javë u trajtua në QKUK.

Si pasojë,  vetëm gjatë këtij viti 13 punëtorë kanë humbur jetën në vendin e punës.

Këtë e ka bërë të ditur Jusuf Azemi, kryetar i Sindikatës së Pavarur të Sektorit Privat.

Azemi ka thënë punëtorët që në shumicën e rasteve janë edhe me fakultete, detyrohen të punojnë në objektet e larta të banimit.

Ai zotohet se për këtë gjendje dikush do të japë llogari.

“Saktësisht janë 13 punëtorë që kanë vdekur deri në këtë vit në vendin e tyre të punës. Këtë vit ka qenë dukuri shumë të shpeshtë me vdekjen e punëtorëve të moshës së re, kjo pasi punëtorët edhe pse të kualifikuar edhe me fakultete ata obligohen të punojnë në ndërtesa 7-8 katëshe. Për këtë duhet të japë llogari dikush”, thotë Azemi.

Qeveritë e Kosovës që nga paslufta edhe pse disa herë janë zotuar për përmirësim të kushteve të punëtorëve, premtimet e tyre kanë mbetur vetëm në letër./Periskopi/