Ismet Beqiri reagon ndaj daljes së Alternativës nga koalicioni: U bënë deputet përmes LDK-së, kurrë më koalicion

Sekretari i përgjithshëm i Lidhjes Demokratike të Kosovës, Ismet Beqiri ka reaguar pas daljes nga koalicioni me partinë e tij, të dy deputetëve të Alternativës, Ilir Dedës dhe Mimoza Kusari Lilës.

Ai ka thënë që informacionin e ka marrë nga portalet, duke nënkuptuar se nuk janë informuar si duhet nga dy deputetët që funksionin në kuadër të grupit të tyre parlamentar.

“Informacionin për daljen e tyre nga Grupi Parlamentar i LDK-së, e kam pa në portale, pra nuk kemi pas ndonjë informacion se kjo do të ndodhë. Ne e respektojmë të drejtën e tyre që të jenë të pavarur, dhe padyshim ajo ombrellë, siç ka deklaru kryetarja e Alternativës, siç e lexova ombrellë e madhe e quajtur LDK, padyshim që iu ka ndihmuar të bëhen deputetë”, ka thënë Beqiri,

Beqiri më tej ka nënkuptuar se LDK-ja ka bërë gabim që ka hyrë në koalicione parazgjedhore, duke e përmendur edhe AKR-në, e cila poashtu i doli nga koalicioni.

“LDK-ja pra e ka pas një koalicion parazgjedhor, dhe është hera e parë që LDK-ja ka pas koalicion parazgjedhor jo vetëm me Alternativën por edhe me AKR-në, dhe ndoshta kjo na bën me mendu më shumë që ky të mbetet i vetmi rast që LDK-ja ka bërë koalicion parazgjedhor. Paszgjedhor sigurisht që duhet të bëhet, pasi që në Kosovë është vështirë për të fituar zgjedhjet si parti e vetme”, tha ai.