Gjykimi për 27 prillin: Todorovi e ka maskuar Ziadin Selën si polic, Shekerinskën si mjeke për t’i nxjerrë nga Kuvendi

I pyetur nga prokurorja Vilma Ruskoska, ai sqaroi ai se më 27 prill ka qenë në Parlament dhe ka marrë pjesë në mbledhjen konstituive, në të cilën disa prej deputetëve iu bashkëngjitën zgjedhjes së kryetarit të Kuvendit, jashtë vendit në të cilin është dashur të bëhet.

“Ne deputetët nga VMRO-DPMNE ishim të tubuar rreth foltores dhe me këngë tentonim ta ndalonim mënyrën e tillë të zgjedhjes së kryetarit të Kuvendit. Askush nga deputetët nuk ishte i dhunshëm”, tha Todorov.

Ai sqaroi se më pas janë nisur drejt sallës së shtypit, ndërkaq ai ka dalë nga salla plenare dhe ka shkuar në kabinetin e kryetarit Trajko Veljanoski ku ka dëgjuar zhurmë dhe kanë dalë për të parë se çka po ndodhë.

“Pashë se salla plenare ishte mbushur me njerëz të cilët këndonin dhe valëvitnin flamuj. Nuk kishte ajër të mjaftueshëm dhe dola në toalet. Më pas m’u paraqit Shekerinska dhe më tha se është jashtë sallës për shtyp, ku një njeri tashmë është i vdekur. Shpejtë u paraqita në Shëtpinë e shëndetit Shkup dhe kërkova ndihmë urgjente mjekësore, pas çka u nisa për në sallën për shtyp”, tha Todorov.

Për shkak se ka pasur tollovi në sallën për shtyp njerëzit e kanë shtyer dhe me sigurimin e tij është tërhequr në garazhet prej ku sërish është paraqitur të pyesë deri ku ka arritur automjeti i ndihmës së shpejtë.

“Drejtoresha më tha se automjeti është para Kuvendit, por ka shumë njerëz dhe nuk mund të hyjnë. Atëherë i thashë nëse nuk mundet automjeti, të hyjnë vetëm mjekët”, tha Todorov.

Pasi që kanë hyrë mjekët, ka shkuar së bashku me ta dhe kanë kërkuar të hyjnë në sallën për shtyp, por nuk kanë mundur. Pas disa tentimeve të pasuksesshme për të hyrë tashmë kishte filluar aksioni policor për tërheqje. Më thanë, shtoi, se Sela është ai më i lënduari, por nuk e dinë se ku është.

“Kërkova nga sigurimi im dhe nga disa policë të tjerë ta kërkojmë në Kuvend. U paraqita tek sekretari shtetëror në Ministrinë e Shëndetësisë, i cili më tha se Sela është në dhomën 203 apo 202 në katin e dytë. U nisëm atje, trokitëm, por askush nuk u paraqit. Unë e theva derën por nuk ishte askush brenda. Më pas u ngjitëm në katin e tretë në dhomën 302 apo 306 ku e gjeta Selën me dy persona të tjerë, të cilët pas thënieve të tij i kanë ndihmuar. Sela më njohu. U përshëdnetëm. I nxorrëm të gjithë jashtë dhe bëmë përjekje që mjekët të punojnë”, potencoi Todorov.

Atëherë mjekja i ka thënë se druan që Sela ka gjakderdhjetë brendshme dhe duhet të transportohet në Spitalin e qytetit.

“Iu paraqita Çavkovit dhe i tregova si është gjendja e Selës dhe se duhet të bëhet aksion për tërheqjen e tij. Për një kohë të shkurtër m’u lajmërua Çavkovi dhe më tha se Sela do të nxirret dhe transportohet në spital. Pas një kohe të shkurtër erdhën njësia speciale. Provuam ta nxjerrim nga hyrja që sheh drejt Tregut të Gjelbër, por kishte grup të madh njerëzish dhe nuk mundëm të dilnim dhe u tërhoqëm. Selën e vendosëm në klubin e deputetëve dhe bëmë ambulancë të improvizuar. Më pas erdhën më shumë policë dhe arritën ta transportojnë Selën nga pjesa e pasme. Që ta nxirrnin Selën, e maskuan si polic, ndërsa Shekerinskën si mjeke”, tha Todorov.

Ka dalë me autoambulancë në të cilën kanë qenë ai, Radmilla Shekerinska dhe dy policë dhe kanë shkuar në Qendrën klinike. Më pas është kthyer në Kuvend për të ndihmuar, por tashmë po zgjaste tërheqja e deputetëve nga LSDM-ja dhe Kuvendi ishte i zbrazët dhe ai ishte nisur për në shtëpi.